ခိုးဝင်လာသည့် တရုတ်နိုင်ငံသားများနှင့် ဗီယက်နမ် နယ်ခြားစောင့်တပ် အပြန်အလှန် ပစ်ခတ် ၇ ဦးသေဆုံး

ဧပြီ ၁၉၊ ၂၀၁၄
M-Media

– တရုတ်နှင့် ဗီယက်နမ် နယ်စပ်အနီးတွင် တရုတ်နိုင်ငံသားများနှင့် ဗီယက်နမ် နယ်ခြားစောင့် တပ်ဖွဲ့အကြား အပြန်အလှန် ပစ်ခတ်မှုများဖြစ်ပွားခဲ့ပြီး လူ ၇ ဦးသေဆုံးခဲ့သည်ဟု သိရသည်။

ယမန်နေ့ နေ့လည်ပိုင်းက ဗီယက်နမ်နိုင်ငံ ကွမ်နင်းပြည်နယ်သို့ တရားမ၀င် ၀င်ရောက်လာသော တရုတ်နိုင်ငံသားများအား ဖမ်းဆီးရာတွင် ပစ်ခတ်မှု ဖြစ်ပွားခဲ့ခြင်းဖြစ်ပြီး သေဆုံးခဲ့သူများမှာ တရုတ်နိုင်ငံသား ၅ ဦးနှင့် ဗီယက်နမ် နယ်ခြားစောင့်တပ်မှ ၂ ဦးတို့ဖြစ်သည်။

ဗီယက်နမ်နိုင်ငံသို့ တရားမ၀င် ၀င်ရောက်လာကြသည့် အမျိုးသား ၁၀ ဦး၊ အမျိုးသမီး ၄ ဦးနှင့် ကလေး ၂ ဦးတို့အား တရုတ်နိုင်ငံသို့ ပြန်ပို့ရန် ဗီယက်နမ် အာဏာပိုင်များက ဆောင်ရွက်နေစဉ် ၎င်းတို့ထဲမှ တစ်ဦးက နယ်ခြားစောင့်တပ်သား၏ သေနတ်ကိုလု၍ ပစ်ခတ်ရာမှ အပြန်အလှန်ပစ်ခတ်မှု ဖြစ်ပွား ခဲ့ခြင်းဖြစ်သည်။

တရုတ်နိုင်ငံသား အချို့မှာ ၎င်းတို့အား ထိန်းသိမ်းထားသည့် ရုံးခန်းမှ ခုန်ချခဲ့ကြပြီး ဒဏ်ရာရသူများရှိခဲ့ကြောင်း ဗီယက်နမ်အစိုးရ၏ ကြေညာချက်တွင် အဖော်ပြထားပြီး၊ ဒဏ်ရာရရှိသူများမှာ မည်သူမည်ဝါဖြစ်သည်ကို ဖော်ပြထားခြင်းမရှိပေ။

ထိုဒေသတွင် လွတ်လပ်စွာသတင်းပေးပို့မှုအား တားမြစ်ထားသောကြောင့် အသေးစိတ်အချက်အလက်များကို သိရှိရခြင်းမရှိချေ။ ဗီယက်နမ်၏ ကွမ်နင်းပြည်နယ်မှာ တရုတ်ဘက်မှ ဂွမ်ရှီပြည်နယ်နှင့် မျက်နှာချင်းဆိုင်ရှိနေပြီး တရုတ်ကုန်သည်များနှင့် ခရီးသွားများမှာ ထိုပြည်နယ်များကို ဖြတ်၍ ဗိယက်နမ်အတွင်းသို့ ၀င်ထွက်သွားလာလေ့ရှိကြသည်။
Ref : ABC News