5 years ago
ရိုဟင်ဂျာ ၇ ဦးကို အိန္ဒိယနိုင်ငံက မြန်မာကို ပထမဆုံးအကြိမ် ပြန်ပို့
6 years ago
ဓာတ်ပြားအဆိုတော် တေးသံရှင် ဒေါ်မာမာဝေ အသက်(၉၃) နှစ် ကွယ်လွန်
6 years ago
ဒုက္ခသည်စခန်းမှ လုပ်အားပေးဆရာမတစ်ဦး ရခိုင်မှ ရန်ကုန်သို့လာစဉ် လဝကဥပဒေဖြင့် အဖမ်းခံရပြီး ထောင်တစ်နှစ်ကျ
6 years ago
ဦးဇော်ဌေး (ခ) မှူးဇော်အား ဌာနပြောင်းရွှေ့တာဝန်ပေး
6 years ago
NVC ကဒ် လက်ခံရန် ဖိအားပေးခံရမှုကို ငြင်းဆိုသော ကမန်တိုင်းရင်းသားများ စီးပွားရေးပိတ်ဆို့ခံနေရ
6 years ago
ASEAN ထိပ်သီးများ ရိုဟင်ဂျာအရေး ဆွေးနွေး
6 years ago
Drone မှုနဲ့ဖမ်းခံရသူ သတင်းထောက်တွေ မိသားစုနဲ့တွေ့ခွင့်မရသေး
6 years ago
မြန်မာ-ဘင်္ဂလားဒေ့ရှ် သဘောတူညီချက် (၁၀)ချက် လက်မှတ်ရေးထိုး
6 years ago
AA ဒုဗိုလ်မှူးကြီး အပါအ၀င် ၉ ဦးကို ငွေကြေးခ၀ါချမှုနဲ့ အမှုဖွင့်စစ်ဆေး
6 years ago
ဘာသာပေါင်းစုံ ဆုတောင်းပွဲ (ရုပ်သံ)

Htin
မတ် ၁၆ ၊ ၂၀၁၆
ရန်ကုန် (Myanmar Now) – ပြည်ထောင်စုလွှတ်တော်ဟာ စစ်တပ် ကျောထောက်နောက်ခံ မဟုတ်တဲ့ အရပ်သားစစ်စစ် သမ္မတတစ်ဦးကို အင်္ဂါနေ့မှာ ရွေးချယ်လိုက်ပါပြီ။
.
၁၉၆၂ ခုနှစ်မှာ စစ်တပ်က ပါလီမန်ဒီမိုကရေစီအစိုးရလက်ထဲကနေ အာဏာသိမ်းပြီးနောက် ဆယ်စုနှစ်ငါးခုကျော် အကြာမှာ ဒီမိုကရေစီနည်းကျစွာနဲ့ အရပ်သားသမ္မတတစ်ဦးကို ပထမဆုံးအကြိမ် တင်မြှောက်လိုက်ခြင်းပဲဖြစ်ပါတယ်။
.
၆၉ နှစ် အရွယ်ရှိပြီဖြစ်တဲ့ ဦးထင်ကျော်ဟာ မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည် အနားမှာ နှစ်ကာလကြာရှည်စွာ ကူညီပံ့ပိုးပေးခဲ့သူတစ်ဦးဖြစ်ပြီး လွန်ခဲ့တဲ့ ရက်သတ္တပတ် ဒုသမ္မတလောင်းအဖြစ် အဆိုပြုမခံရမီအချိန်ထိတော့ သူဘယ်သူဘယ်ဝါဆိုတာကို ပြည်သူတွေက တိတိကျကျ မသိကြပါဘူး။
.
သူ့ကို လွှတ်တော်မှာ စုစုပေါင်းမဲ ၆၅၂ မဲအနက် ထောက်ခံမဲ ၃၆ဝ နဲ့ ဖွဲ့စည်းပုံအခြေခံဥပဒေက နိုင်ငံရဲ့ အမြင့်ဆုံးအဆင့်ကိုပေးထားတဲ့ သမ္မတရာထူးအတွက် ရွေးချယ်တင်မြှောက်လိုက်ခြင်းဖြစ်ပါတယ်။ တပ်မတော်သားကိုယ်စားလှယ်အစုအဖွဲ့က တင်တဲ့ ဦးမြင့်ဆွေက ၂၁၃ မဲ၊ အမျိုးသားလွှတ်တော်ကတင်တဲ့ အမျိုးသားဒီမိုကရေစီအဖွဲ့ချုပ် (NLD) ကိုယ်စားပြု အမတ်တစ်ဦးဖြစ်တဲ့ ချင်းတိုင်းရင်းသား ဦးဟင်နရီဗန်ထီးယူက ၇၉ မဲ ရရှိကြပြီး ဒုသမ္မတများ ဖြစ်လာကြပါတယ်။
.
မဲရလဒ်တွေကို ကြေညာချိန်မှာတော့ ဒေါ်အောင်ဆန်းစုကြည်အပါအဝင် ပြည်ထောင်စုလွှတ်တော်ကိုယ်စားလှယ်တွေဟာ လက်ခုပ်ဩဘာတီးပြီး ရလဒ်ကို သောင်းသောင်းဖြဖြ ကြိုဆိုဂုဏ်ပြုခဲ့ကြပါတယ်။
.
စစ်အာဏာရှင်စနစ်အောက်မှာ နှစ်ပေါင်းများစွာ ကြာမြင့်ခဲ့တဲ့ မြန်မာနိုင်ငံ အတွက် ဦးထင်ကျော် သမ္မတဖြစ်လာခြင်းဟာ အရပ်သားတွေရဲ့ အခန်းကဏ္ဍအားကောင်းလာမယ့် သဘောကို ပြနေပေမယ့် အသက် ၇ဝ ရှိပြီဖြစ်တဲ့ ဒေါ်အောင်ဆန်းစုကြည်ကို သမ္မတ မဖြစ်အောင် တားထားနိုင်ပြီး သဘောထားတင်းမာသူလို့ နာမည်ထွက်တဲ့ စစ်တပ်ခေါင်းဆောင်ဟောင်းတစ်ဦးကို ဒုသမ္မတအဖြစ် တင်နိုင်ခဲ့တဲ့ စစ်တပ်ရဲ့ ဆက်လက်လွှမ်းမိုးချုပ်ကိုင်ထားမှုကိုလည်း သိထားဖို့ လိုပါမယ်။
.
ဦးထင်ကျော်ဟာ ဒေါ်အောင်ဆန်းစုကြည်ရဲ့ ‘ရုပ်ပြသမ္မတ’ အနေနဲ့ပဲရှိမှာဖြစ်ပြီး သမ္မတရဲ့အထက်မှာ သူရှိနေမယ်လို့ ဒေါ်စုကိုယ်တိုင်က ပြောထားပြီးဖြစ်ပါတယ်။
.
ဒေါ်အောင်ဆန်းစုကြည်ရဲ့ NLD အနေနဲ့ ပြီးခဲ့တဲ့ နိုဝင်ဘာရွေးကောက်ပွဲမှာ ထောက်ခံမဲ အပြတ်အသတ်နဲ့ နိုင်သွားပြီး တဲ့နောက် ပြည်သူတွေက လူထုခေါင်းဆောင်အပေါ် နှစ်ခြိုက်လိုလားတယ် ဆိုတာကို တပ်မတော်အနေနဲ့ နောက်ဆုံး နားလည်လက်ခံသွားပြီး ဖွဲ့စည်းပုံအခြေခံဥပဒေထဲက ပုဒ်မတစ်ခုကို ပြန်လည် ပြင်ဆင်ပေးလေ မလားရယ်လို့ မျှော်လင့်ချက်တွေ မြင့်မားခဲ့ကြပါတယ်။
.
ဒါပေမယ့် ၂ဝဝ၈ ဖွဲ့စည်းပုံအခြေခံဥပဒေအရ မိမိရဲ့ ခင်ပွန်း၊ ဇနီးသည်နဲ့ သား၊ သမီးတွေ နိုင်ငံခြားသားဖြစ်နေရင် သမ္မတတာဝန်ယူခွင့် မရှိပါဘူး။ ဒေါ်အောင်ဆန်းစုကြည်ရဲ့ ကွယ်လွန်သွားပြီဖြစ်တဲ့ ခင်ပွန်းဟာ ဗြိတိန်နိုင်ငံသားတစ်ဦးဖြစ်သလို သူတို့သားနှစ်ဦးဟာလည်း လက်ရှိမှာ ဗြိတိန်နိုင်ငံသားတွေဖြစ်ကြပါတယ်။
.
ဒေါ်အောင်ဆန်းစုကြည်က အစိုးရအဖွဲ့သစ်မှာ နိုင်ငံခြားရေး ဝန်ကြီးတစ်ဦးအဖြစ် တာဝန်ထမ်းဆောင်သွားမယ်ဆိုတဲ့ ခန့်မှန်းချက်တွေ ရှိပါတယ်။ ဒီရာထူးကိုယူခဲ့မယ်ဆိုရင် သူ့အနေနဲ့ နိုင်ငံရဲ့ နိုင်ငံခြား ဆက်ဆံရေးကို ဦးဆောင်ရင်း တစ်ဖက်ကလည်း လုံခြုံရေးဆိုင်ရာ ကိစ္စရပ်တွေဆုံးဖြတ်ရာမှာ အဓိကကျတဲ့ အဖွဲ့ဝင် ၁၁ ဦးပါ အမျိုးသားလုံခြုံရေးနှင့် ကာကွယ်ရေးကောင်စီမှာ ပါဝင်ခွင့်ရမှာဖြစ်ပါတယ်။
.
ဒေါ်အောင်ဆန်းစုကြည်နဲ့ ရင်းနှီးတယ်ဆိုတာကလွဲပြီး ဦးထင်ကျော်ရဲ့ နောက်ကြောင်း အချက်အလက်တွေကို သိပ်မသိကြပေမယ့် ပြည်သူတွေကတော့ သူတို့ရဲ့ မထင်မရှား သမ္မတသစ်အပေါ် အပြုသဘောနဲ့ မြင်ကြပါတယ်။
.
မြန်မာ့ နိုင်ငံရေးခေတ် စနစ်ပေါင်းစုံကို ဖြတ်သန်းခဲ့ဖူးတဲ့ ဝါရင့်နိုင်ငံရေးသမားကြီး သခင်ချန်ထွန်းကတော့ “တိုင်းပြည်ရဲ့ အနာဂတ် ပိုကောင်းလာမယ်လို့ မျှော်လင့်ပါတယ်” လို့ ပြောပါတယ်။
.
“NLD ပါတီ အစိုးရဖွဲ့နိုင်ပြီဖြစ်လို့ ဖွဲ့စည်းပုံအခြေခံဥပဒေ ပြင်ဆင်ရေးကို သူတို့ ဖြစ်စေချင်သလို တဖြည်းဖြည်း လုပ်ဆောင် သွားနိုင်မယ်လို့ ထင်ပါတယ်။ ဦးထင်ကျော်အကြောင်းကိုတော့ ကျွန်တော် အများကြီးမသိလို့ မှတ်ချက်မပေးလိုပါဘူး” လို့ သခင်ချန်ထွန်းက ပြောပါတယ်။
.
ရန်ကုန်မြို့ထဲမှာ မုန့်ဆိုင်ဖွင့်ထားတဲ့ အသက် ၄၃ နှစ်အရွယ် ဒေါ်ခင်မိုးသီ ကတော့ ရွေးကောက်ပွဲမှာ NLD ကို မဲထည့်ခဲ့သူတစ်ဦးပါ။
.
သူက “လှိုက်လှဲစွာကြိုဆိုပါတယ်၊ ဦးထင်ကျော် သမ္မတဖြစ်တာကိုပေါ့။ ဆရာကြီး ဦး(မင်း)သုဝဏ်ရဲ့သား ဖြစ်ရုံတင်မကဘူး။ သူကိုယ်တိုင်ကလည်း ပညာတတ်တစ်ယောက်ဖြစ်တဲ့အတွက် တိုင်းပြည်အတွက် အများကြီးမျှော်လင့်မိပါတယ်။ ကျွန်မတို့မှာ သားသမီးတွေလည်းရှိတော့ သူတို့ရဲ့အနာဂတ်အတွက်တင်မကဘူး ကျွန်မတို့ အသက်ကြီးသွားတဲ့အခါမှာ ရင်ဆိုင်ရမှာတွေအတွက်ပါ စိတ်အေးသွားသလိုခံစားရပါတယ်” လို့ ပြောပါတယ်။
.
ရန်ကုန်မြို့ထဲမှာပဲနေတဲ့ အသက် ၆၇ နှစ်ရှိပြီဖြစ်တဲ့ မွတ်စလင်တစ်ဦးဖြစ်သူ ဦးကျော်ဇံကတော့ ဦးသိန်းစိန် လက်ထက်မှာ ဗုဒ္ဓဘာသာ အစွန်းရောက်တွေ ဖြန့်ခဲ့တဲ့ မွတ်စလင် မုန်းတီးရေးတရားတွေကို အစိုးရသစ်က ရပ်တန့် ပေးနိုင်လို့မယ်လို့ထင်ကြောင်း ပြောပါတယ်။
.
“ဘာသာရေးနဲ့ပတ်သက်တဲ့ ပဋိပက္ခတွေလည်း လာမယ့် အစိုးရသစ်လက်ထက်မှာ ကွယ်ပျောက်သွားလိမ့်မယ် လို့ ထင်ပါတယ်။ ဒေါ်အောင်ဆန်းစုကြည် သမ္မတ မဖြစ်နိုင်တာလည်း ကောင်းပါတယ်။ သူက အသက်ကြီးပြီဆိုတော့ နားနားနေနေနဲ့ဆိုတော့ အချိန်ကြာကြာနဲ့ပိုပြီးတော့ ဦးဆောင်နိုင်လိမ့်မယ်လို့ ထင်ပါတယ်” လို့ ပြောပါတယ်။
.
ရန်ကုန်မြို့ကပဲ ထင်ရှားတဲ့ မွတ်စလင်ခေါင်းဆောင် တစ်ဦးဖြစ်တဲ့ ဦးအေးလွင်ကတော့ သူဟာ သမ္မတသစ်အဖြစ် ရွေးကောက်ခံ ထားရတဲ့ ဦးထင်ကျော်နဲ့ တစ်ကျောင်းတည်း တက်ဖူးပြီး သဘောကျစရာကောင်းတဲ့ လူတစ်ယောက် အဖြစ် သိထားတယ်လို့ ပြောပါတယ်။ မနှစ်က ဒေါ်အောင်ဆန်းစုကြည် အိမ်မှာလုပ်တဲ့ ဘာသာပေါင်းစုံ ချစ်ကြည်ရေးအစည်းအဝေး တစ်ခုမှာ ဦးထင်ကျော်နဲ့ ဆုံဖူးစဉ်က မှတ်မိတာတစ်ခုကို ပြောပြပါတယ်။
.
“ကိုယ်က မိတ်မဆက်ခင် သူကအရင်လာပြီးတော့ကို စကားပြောတာ။ ဆိုလိုတာက သူက အင်မတန်စိတ်ထားနူးညံ့တဲ့သူပါ။ ဘာမာန်မာနမှရှိဘူး” လို့ ဦးအေးလွင်က ဆိုပါတယ်။
.
ဒါ့ပြင် ဦးအေးလွင်က သမ္မတသစ်ရဲ့လက်အောက်မှာ မြန်မာနိုင်ငံက မွတ်စလင်တွေဟာ ဖွဲ့စည်းပုံအခြေခံဥပဒေပါ အတိုင်း နိုင်ငံသား အခွင့်အရေးတွေ အပြည့်အဝရလာပြီး တရားဥပဒေစိုးမိုးမှုကိုလည်း ခံစား ရလိမ့်မယ်လို့ မျှော်လင့်ကြောင်းလည်း ပြောပါတယ်။
.
ရန်ကုန်နိုင်ငံရေးသိပ္ပံကျောင်းကို တည်ထောင်သူတစ်ဦးဖြစ်တဲ့ ကိုမြတ်သူက သမ္မတသစ်ဟာ အခြေခံ ဥပဒေအရ သူ့ကိုလုပ်ပိုင်ခွင့်ပေးထားတဲ့ ဝန်ကြီးဌာနတွေမှာ ပြုပြင်ပြောင်းလဲရေးကို အောင်အောင် မြင်မြင် လုပ်နိုင်လိမ့်မယ်လို့ ထင်ကြောင်း ပြောပါတယ်။ ဒါပေမဲ့ စစ်တပ်က တိုက်ရိုက်ခန့်ထားမယ့် ကာကွယ်ရေး၊ ပြည်ထဲရေးနဲ့ နယ်စပ်ရေးရာ ဝန်ကြီးဌာနတွေအပေါ်မှာတော့ အလားတူ တိုးတက်မှုမျိုးကို မြင်ရနိုင်မှာ မဟုတ်ဘူးလို့လည်း ဖြည့်စွက်ပြောပါတယ်။
.
ဒေါ်စုအပေါ်သစ္စာခံတဲ့ သမ္မတ၊ ဦးသန်းရွှေရဲ့လူယုံတော် ဒုသမ္မတ
—————————————————————–
ဦးထင်ကျော်ဟာ မျိုးရိုးစဉ်ဆက် ကောင်းသူတစ်ဦးဖြစ်ပါတယ်။ သူဟာ လန်ဒန်တက္ကသိုလ်ကနေ ကွန်ပြူတာသိပ္ပံဘာသာရပ်နဲ့ ဘွဲ့ရသူတစ်ဦးပါ။ မြန်မာစာပေလောကမှာ ထင်ရှားကျော်ကြားတဲ့ ကဗျာဆရာတစ်ဦးဖြစ်သလို စာရေးဆရာတစ်ဦးလည်းဖြစ်တဲ့ ဆရာကြီးမင်းသုဝဏ်ရဲ့ သားဖြစ်ပါတယ်။ မင်းသုဝဏ်ဟာ ၁၉၉ဝ ရွေးကောက်ပွဲတုန်းကလည်း ကမာရွတ်မြို့နယ်ရဲ့ ရွေးကောက်ခံ ကိုယ်စားလှယ် တစ်ဦးဖြစ်ပေမယ့် အဲဒီတုန်းက စစ်အစိုးရအနေနဲ့ ရွေးကောက်ပွဲကို အသိအမှတ်မပြုခဲ့ပါဘူး။
.
ဦးထင်ကျော်ဟာ ယခုလွှတ်တော်သက်တမ်းမှာ ကိုယ်စားလှယ်တစ်ဦးမဟုတ်ပေမယ့် စစ်အစိုးရ လက်ထက် ဒေါ်အောင်ဆန်းစုကြည် နေအိမ် အကျယ်ချုပ်ကျခံရစဉ် ကတည်းက အနီးကပ် ကူညီခဲ့သူတစ်ဦးပါ။ သူဟာ ဒေါ်ခင်ကြည်ဖောင်ဒေးရှင်းရဲ့ အကြီးတန်း အမှုဆောင်အဖွဲ့ဝင်တစ်ယောက်လည်း ဖြစ်ပါတယ်။
.
သူ့ရဲ့ဇနီးဖြစ်သူ ဒေါ်စုစုလွင်ကတော့ ၂ဝ၁၂ ခုနှစ် ကြားဖြတ်ရွေးကောက်ပွဲနဲ့ ပြီးခဲ့တဲ့နှစ် နိုဝင်ဘာ ရွေးကောက်ပွဲတွေမှာ နှစ်ကြိမ်ဆက်တိုက် ရွေးကောက်တင်မြှောက်ခံခဲ့ရသူတစ်ဦးဖြစ်ပါတယ်။ ဒေါ်စုစုလွင်ရဲ့ ဖခင်ကလည်း NLD ပါတီကို ကနဦးစတင်ထူထောင်ခဲ့သူတွေထဲမှာ တစ်ဦးအပါအဝင်ဖြစ်ပါတယ်။
.
“ဦးထင်ကျော်က ကိုယ်ရည်ကိုယ်သွေးကောင်းသူ တစ်ယောက်ပါ။ ဒေါ်အောင်ဆန်းစုကြည်ကို သူ တောက်လျှောက် ကူညီလာခဲ့တယ်။ ပိုပြီး အရေးကြီးတဲ့ အချက်က ဒေါ်အောင်ဆန်းစုကြည် သမ္မတဖြစ်ဖို့ ဖွဲ့စည်းပုံအခြေခံဥပဒေက ခွင့်ပြုလိုက်ပြီဆိုရင် သူဟာ သမ္မတတာဝန်ကို လိုလိုလားလားနဲ့ကို လွှဲပြောင်းပေးမှာပါ” လို့ သမ္မတစိစစ်ရွေးချယ်ရေးမှာ ပါဝင်ခဲ့သူ တစ်ဦးဖြစ်သူ NLD ရဲ့ အမျိုးသားလွှတ်တော်ကိုယ်စားလှယ် ဦးဘမျိုးသိန်းက ပြောပါတယ်။
.
လွှတ်တော်က ဒုသမ္မတနှစ်ဦးကိုလည်း ရွေးချယ်ခဲ့ရာမှာ နှစ်ဦးစလုံးက စစ်တပ်အရာရှိဟောင်းတွေပဲ ဖြစ်ပါတယ်။
.
ဒုတိယဗိုလ်ချုပ်ကြီးဟောင်းတစ်ဦးဖြစ်ပြီး လက်ရှိ ရန်ကုန်တိုင်းဒေသကြီး ဝန်ကြီးချုပ် ဦးမြင့်ဆွေကို လွှတ်တော်မှာ ၂၅ ရာခိုင်နှုန်း နေရာယူထားတဲ့ စစ်တပ်ကိုယ်စားလှယ်တွေက တင်မြှောက်ခဲ့လို့ ဒုတိယမဲအများဆုံးရသွားခဲ့ ဒုသမ္မတ (၁) နေရာကို ရရှိသွားခဲ့ပါတယ်။ သူ ဒုသမ္မတဖြစ်လာတာဟာ နာမည်မကောင်းတဲ့စစ်အစိုးရခေတ်က လူတစ်ယောက်ကို NLD အစိုးရအဖွဲ့အတွင်း အက္ခရာကျကျ သွတ်သွင်းလိုက်တဲ့ အနေအထားဖြစ်ပါတယ်။
.
ဦးမြင့်ဆွေဟာ ယခင်အာဏာရှင်ဟောင်း ဗိုလ်ချုပ်မှူးကြီး သန်းရွှေနဲ့ နီးစပ်သူတစ်ဦးဖြစ်တယ်လို့ သိထားကြသလို ၂ဝဝ၄ ခုနှစ်တုန်းက ထောက်လှမ်းရေးခေါင်းဆောင်ဖြစ်တဲ့ ဗိုလ်ချုပ်ကြီး ခင်ညွန့်ကို ဖယ်ရှားခဲ့တဲ့ဖြစ်ရပ်အပြီးမှာလည်း ထောက်လှမ်းရေးကို ကိုင်တွယ်ရသူဖြစ်လာပါတယ်။ ဦးမြင့်ဆွေဟာ အမေရိကန်အစိုးရရဲ့ ပိတ်ဆို့အရေးယူမှုခံထားရသူတွေ စာရင်းထဲမှာ ၂ဝဝ၇ ရွှေဝါရောင်တော်လှန်ရေးဖြိုခွဲမှုအပြီးတစ်နှစ်အကြာမှာ ထည့်သွင်းခံထားရသူဖြစ်ပြီး၊ ယခုအချိန်ထိလည်း ဒီစာရင်းထဲမှာရှိနေပါသေးတယ်။
.
ဒုသမ္မတ (၂) ဦးဟင်နရီဗန်ထီးယူကလည်း စစ်တပ်အရာရှိဟောင်း တစ်ဦးဖြစ်သလို NLD ပါတီရဲ့ ချင်းတိုင်းရင်းသား လွှတ်တေ်ာ ကိုယ်စားလှယ်ဖြစ်ပါတယ်။ ။

ဓါတ်ပုံအညွှန်း- မတ်လ ၁၁ ရက်နေ့က နေပြည်တော်မှာ တွေ့ရတဲ့ ဦးထင်ကျော် နဲ့ ဇနီး ဒေါ်စုစုလွင် (ဓာတ်ပုံ – NLD)

Myanmar Now သတင်းဌာနမှ ကူးယူဖော်ပြသည်။

Leave a Reply