1 week ago
ဘာသာခြားများကိုသတ်ရန် ခြိမ်းခြောက်လှုံ.ဆော်သူကို ထောင် ၈ ရက်ပြစ်ဒဏ်ချ
1 week ago
လူသတ်ရန် လမ်းပေါ်ထွက် အော်ဟစ်ခြိမ်းခြောက်သူကို ရန်ကုန်ရဲပြန်လွှတ်
1 week ago
လတ်တလော အခြေအနေတွေအပေါ် မြန်မာမွတ်စလင်မ် လူ့အဖွဲ့အစည်းက ဘာပြောကြသလဲ
1 week ago
တောင်​တွင်းကြီးမြို့ ဖျက်ဆီးလုယက်မှု ဖြစ်စဉ်အကြောင်း ဒေသခံတွေ ပြောပြချက်
2 weeks ago
တောင်တွင်းကြီးမှ ရမ်းကားသူတွေ လမ်းပေါ်တွင်ရှိနေသေး၊ အုန်း​တော်​၂ လမ်း ရှိအိမ်တအိမ်ထဲသို့ လူအုပ်စုဖြင့် ဝင်ရောက်ဖျက်ဆီးရန် လုပ်ဆောင်နေ
2 weeks ago
တောင်တွင်းကြီးတွင် လူအုပ်စုဖြင့် ဆိုင်ခန်းများ ဖျက်ဆီးမှုများပြုလုပ်
2 weeks ago
အစ္စလာမ်ဘာသာရေးအဖွဲ့ကြီးမှ အကြမ်းဖက်မှုများနှင့်စပ်လျဉ်း၍ သဘောထားထုတ်ပြန်
2 weeks ago
ပုံစံအသစ်နဲ့ ဝါဒဖြန့်ချိမှုတွေ သတိထားကြစေဖို့
2 weeks ago
တောင်ငူ အစ္စလာမ်သချိုင်္င်းတွင် လက်နက်များ ဖွက်နေဆိုသော သတင်းမဟုတ်ဟု ရဲတပ်ဖွဲ့ ပြောကြား
2 weeks ago
အကြမ်းဖက်မှုတိုက်ခိုက်မှု သတင်းနှင့် သွေးထိုးလှုံ့ဆော်မှုများကို အထူးသတိပြုဖို့ နိုင်ငံတော်၏ အတိုင်ပင်ခံရုံးမှ သတင်းထုတ်ပြန်

သောင်းကျန်းသူတွေလာနေပြီဟေ့….လက်နက်ကိုင်အကြမ်းဖက်သောင်းကျန်းသူတွေနဲ့ တပ်မတော်တို့ တိုက်ပွဲတွေဖြစ်နေပြီ… ပြည်သူ့ဘ၀တွေမငြိမ်းချမ်း အသက်လုပြေးနေရပြီ……စသည့် ရင်မောဖွယ်ပြည်တွင်းစစ်သတင်းတွေကို ငယ်စဉ်ဘ၀တည်းက TV-ဖန်သားပြင်၊သတင်းစာများ (ပုံပါ) မှာ အစဉ်မြင်တွေ့နေခဲ့။

စိတ်တွေပူသက်ပြင်းတွေချရင်း စစ်ပွဲတွေရပ်ပါတော့လို့ ဆုတောင်းခဲ့ရသည်မှာလည်းအခါခါ။ လွတ်လပ်ရေးရပြီးနှောင်းပိုင်း မြန်မာပြည်အနှံ့ (KNU၊ KIO၊ KIA၊ AA၊ TNLA၊….) စသည့် များစွာသော လက်နက်ကိုင် အကြမ်းဖက်သောင်းကျန်းသူအဖွဲ့များ(ယခင်အသုံးအနှုန်း) အရှိုရှိုပေါ်လာခဲ့သလို ပြည်တွင်းစစ်မီးလျှံတို့ တောက်လောင်နေခဲ့သည်မှာလည်း ဘာလိုလိုနဲ့ နှစ် (၇၀) ၀န်းကျင်တောင်ကြာခဲ့လေပြီ။

သို့ပေမယ့်လည်း နိုင်ငံ့အကျိူးမျှော်ကိုးသည့် ခေါင်းဆောင်များ၊အဖွဲ့အစည်းများ၏ မနားမနေ အားထုတ်ကြိုးပမ်းမှုတွေကြောင့် ယခုအခါ တိုင်းရင်းသားလက်နက်ကိုင်အဖွဲ့များဟု ပြောင်းလဲသုံးနှုန်းခြင်း၊ ငြိမ်းချမ်းရေးဆွေးနွေးပွဲ ဇာတ်ခုံပေါ်၌ တရင်းတနှီး ဆွေးနွေးနေကြခြင်း စသည့် အပြုသဘောဆောင် ပြောင်းလဲလာမှုတို့ကို မြင်တွေ့ရသည့်အခါ စစ်မှန်သည့် ဒီမိုကရေစီဖက်ဒရယ်ပြည်ထောင်စုကြီး ပေါ်ထွန်းလာဖို့ ရောင်နီသန်းလာပြီဟုတွေးရင်း ပြုံးမိသည်။

(ARSA) သောင်းကျန်းသူအဖွဲ့ဆိုတာ
————————————-
ဒါပေမယ့် ကြည်နူးစိတ်တွေ မရှည်ကြာလိုက်။ အတောမသတ်နိုင်တဲ့ စစ်ပွဲတွေအကြား ပြည်သူ့ဘ၀တွေ နာလန်မထူနိုင်သေးချိန်၊ ငြိမ်းချမ်းမှုတည်ဆောက်ရင်း နိုင်ငံ့အနာဂတ် ဖွံ့ဖြိုးတိုးတက်မှုဆီ ရည်သန်ချိန်…….. ဟော..ပေါ်လာပြန်ပြီ နောက်တိုး (ARSA) သောင်းကျန်းသူအဖွဲ့တဲ့။ ထိုအဖွဲ့သည် ရခိုင်ပြည်မြောက်ပိုင်းတွင် ခြေကုတ်ယူရန်ကြိုးစားနေပြီး မောင်တောဒေသ၌ တပ်မတော်နှင့် လက်တလော တိုက်ပွဲဖြစ်ပွားနေဆဲ။ တိုက်ခိုက်၊မီးရှို့၊သေကြေပျက်စီးကြသည့် အနိဌာရုံ ဓာတ်ပုံ-ဗီဒီယိုမှတ်တမ်းများ ဆက်တိုက်ဆိုသလို သတင်းနှင့်အွန်လိုင်းပေါ် ပျံ့နှံ့လာတာတွေ့ရတော့ စစ်ဘေးဒဏ်သင့် ပြည်သူတွေအားလုံးအတွက် လွန်စွာရတက်မအေးဖြစ်ရသည်။ အောက်တိုဘာလ-၂၀၁၆ တွင်လည်း Harakah al-Yaqin အမည်ခံ ထိုအုပ်စုမှ ရဲကင်းများအား စတင်တိုက်ခိုက်ခဲ့ခြင်းကို အစပြု၍ တပ်မတော်နှင့် တိုက်ပွဲများ ဖြစ်ပွားခဲ့သော်လည်း နယ်မြေတည်ငြိမ်အေးချမ်းမှုကို အလျင်အမြန် ပြန်လည်တည်ဆောက်နိုင်ခဲ့သည်။ ယခုဖြစ်စဉ်မှာလဲ ထိုနည်းတူ တည်ငြိမ်မှုကို အမြန်ဆုံး အကောင်အထည်ဖော်နိုင်မည်ဟု မျှော်လင့်ပါသည်။

စစ်ဘေးရှောင်တို့အရေးပေါ်အကူအညီလိုအပ်
————————————-
တိုက်ပွဲတွေဖြစ်ပြီဟေ့ဆိုလျင် ဒေသခံစစ်ဘေးရှောင် ပြည်သူတွေအပေါ် ကိုယ်ချင်းစာသနားစိတ်၊ လူသားချင်းစာနာစိတ်၊ ပရဟိတစိတ်အပြည့်ဖြင့် တက်တက်ကြွကြွ ကူညီပေးတတ်ကြသည်မှာလည်း ကျွန်ုပ်တို့မြန်မာတွေ၏ မွန်မြတ်သော ဂုဏ်ယူဖွယ်ရာ အလေ့အထတစ်ခုပါ။ ယခုဖြစ်ပွားနေသည့် မောင်တောဒေသ ပြဿနာနှင့်စပ်လျဉ်း၍ သောင်းကျန်းသူနဲ့ စစ်ဘေးရှောင်ဒေသခံတွေကို ခွဲခြားမြင်တတ်ဖို့လိုသလို အပြစ်မဲ့ပြည်သူများအား မေတ္တာသဒ္ဓါတရားထားပြီး အယုတ်အလတ်အမြတ်မရွေး အကူအညီပေးကြရင်း သာဓုအနုမောတနာ ခေါ်နိုင်ကြပါစေလို့ စာဖတ်ပရိတ်သတ်ကို တိုက်တွန်းပါရစေ။

သဟဇာတအခြေပြု ငြိမ်းချမ်းမှုတည်ဆောက်ဖို့လို
————————————-
ရခိုင်ပြည်ကြီး ငြိမ်းချမ်းမှုတွေနဲ့ဝေးနေဆဲ၊ ပြည်သူတွေ စိတ်ဆင်းရဲကိုယ်ဆင်းရဲဖြစ်နေဆဲဆိုတာ လက်ရှိမတည်ငြိမ်မှုတွေက သက်သေပါ။ ရခိုင်ပြည်တွင် ရခိုင်၊မြို၊ကမန်၊ခမီ၊ ဒိုင်းနက်၊…အစရှိသည့် မျိူးနွယ်စုများအပါအ၀င် (မျိူးနွယ်စု အမည်နာမကိစ္စ အငြင်းပွားလျက်ရှိသော) ထိုလူ့အဖွဲ့အစည်းတို့သည် အချိန်အတိုင်းအတာတစ်ခုအထိတော့ ရခိုင်မြေမှာနေ၊ ရခိုင်ရေကိုသောက် အတူ ယှဉ်တွဲနေထိုင်ကြီးပြင်း လာကြသူတွေဆိုတာ မှတ်တမ်းမှတ်ရာများအရ တွေ့ရသည်။ ဒီနေရာမှာ စာရေးသူတစ်ခု သတိထားမိတာက- (ဘင်္ဂလီ (တစ်နည်း) ရိုဟင်ဂျာအခေါ်အဝေါ် မည်သို့ပင်ဆိုစေကာမူ) ဒီမျိူးနွယ်တစ်စုမရှိရင် တို့ရခိုင်ပြည်အေးချမ်းပြီ” ဆိုသည့် ခံယူချက်မျိူး ရှိကောင်းရှိကြလိမ့်မည်။

အမှန်တကယ်တော့ ရခိုင်ပြည် ငြိမ်းချမ်း၏-မငြိမ်းချမ်း၏ဆိုသည်မှာ ဤ/ထို မျိူးနွယ်စု ရှိ၏-မရှိ၏နှင့်မဆိုင်ပါ။ ဘာသာ-လူမျိူး-အသားအယောင် မည်သို့ပင်ကွဲပြားနေစေကာမူ ရခိုင်မြေကို ချစ်မြတ်နိုးသည့် စိတ်ခံယူချက်တွေပေါ်အခြေခံပြီး အချင်းချင်း ယုံကြည်၊လေးစား၊မေတ္တာထား၊အကျိူးပြုမှုတွေနှင့် ပြန်လည်တည်ဆောက်နိုင်ရင် ရခိုင်ပြည်ကြီး ငြိမ်းချမ်းမှုနှင့် အလှမ်းဝေးတော့မည်မဟုတ်ဟု ယုံကြည်မိသည်။

မြောက်ဦးလွှတ်တော်အမတ်တစ်ဦး ပြောခဲ့ဖူးသည့် အဖိုးတန်စကားလေးတစ်ခုက- “တို့တွေက peaceful coexistence ဖြစ်အောင်ကြိုးစားရမယ်။ peaceful coexistence ရှိကိုရှိရမယ်။ ဒါ civilized သွားရမယ့်ကိစ္စ၊ အရင်တုန်းကတစ်သက်လုံး ရခိုင်ပြည်မှာ တို့တွေအတူနေလာခဲ့ကြတာပဲ…” (ဦးဦးလှစော။ ။၁၆-မတ်လ-၂၀၁၃။ ကမ်ဘာရာမြို့)

မကြာသေးမီကထုတ်ပြန်ခဲ့သော ရခိုင်ပြည်နယ်ဆိုင်ရာ အကြံပေးကော်မရှင်၏ အစီရင်ခံစာပါ “လူ့အဖွဲ့အစည်းအားလုံး သဟဇာတဖြစ် ငြိမ်းချမ်းစွာ အတူယှဉ်တွဲနေထိုင်နိုင်ရေး” အကြံပြုချက်များ အလျင်အမြန် အကောင်အထည်ဖော် စွမ်းဆောင်သွားမည်ဟု နိုင်ငံတော်အတိုင်ပင်ခံရုံး (၂၄-သြဂုတ်လ-၂၀၁၇)ရက်စွဲပါ ထုတ်ပြန်ချက်အပေါ် နှစ်ထောင်းအားရဖြစ်မိသည်။

ကုစားချိန်တန်ပြီဖြစ်သည့် ဒဏ်ရာတစ်ခု
————————————-
တစ်ဖက်မှာလည်းပဲ ဆယ်စုနှစ်များစွာကတည်းက ဖြေရှင်းခဲ့ရမည့် ထိုသူတို့၏ လ၀ကဆိုင်ရာ၊မျိူးနွယ်စုအမည်နာမဆိုင်ရာ ကိစ္စရပ်များနှင့်ပက်သက်၍ လက်ရှိနိုင်ငံတော်အကြီးအကဲများမှ ဦးဆောင်ဦးရွက်ပြုပြီး သမိုင်းကြောင်းအရ (ခောတ်အဆက်ဆက်မှ ရခိုင်ပြည်နယ်နမိတ်၊ နယ်စပ်ပထ၀ီအနေအထား)တို့နှင့်ယှဉ်ပြီး အမြန်ဆုံး ညှိနှိုင်းအဖြေရှာပါက ရခိုင်ပြည် တည်ငြိမ်အေးချမ်းရေးအတွက် လွန်စွာအထောက်အကူပြုနိုင်ပေမည်။

ရေတို၊ ရေရှည် စီမံကိန်းများ
——————————
အစိုးရအနေဖြင့် ထို (ARSA) အစွန်းရောက်အကြမ်းဖက်သမားများအား ပြတ်ပြတ်သားသားကိုင်တွယ်ဖြေရှင်းရေး၊ အပြစ်မဲ့စစ်ဘေးဒဏ်သင့်ပြည်သူမျာအား လူသားချင်းစာနာသည့် အကူအညီတွေပေးရေး၊ အောက်ခြေဆောင်ရွက်မှုများကို မီဒီယာများ သတင်းအမှန်ရယူနိုင်ရေး၊ ဒေသခံပြည်သူများအကြား သဟဇာတဖြစ်ငြိမ်းချမ်းစွာ အတူပြန်လည်ယှဉ်တွဲနေထိုင်လာနိုင်ရေး၊ တရားဥပဒေစိုးမိုးရေး၊ ဖွံ့ဖြိုးတိုးတက်လာရေး၊ အစရှိသည့် ရေတို-ရေရှည် စီမံကိန်းများအား အလျင်အမြန် အကောင်အထည်ဖော်သင့်ပါကြောင်းလည်း အကြံပြုလိုသည်။

ငြိမ်းချမ်းမှုမှ တိုးတက်မှုဆီလှမ်းဖို့
————————————-
သာဓကယူစရာတစ်ချက်က-၂၀၁၂ မောင်တောဒေသမှ အစပြုခဲ့သည့် မတည်ငြိမ်မှု နောက်ဆက်တွဲများမှ မြန်မာပြည်အနှံ့ မလိုလားအပ်သည့် ဘာသာရေး၊လူမျိူးရေးဆန်ဆန် အထိကရုဏ်းများ၊မတည်ငြိမ်မှုများ ဆက်လက်ဖြစ်ပွားခဲ့ရာမှ တစ်ဖြည်းဖြည်း တည်ငြိမ်စပြုနေပြီဟုဆိုနိုင်ပေမယ့်လဲ ပြည်သူတွေအကြား စိုးရိမ်ထိတ်လန့်နေမှုတို့သည် အလျင်းပျောက်ကွယ်မသွားသေးပါ။

ယခုတစ်ဖန် မောင်တောဒေသမှ သောင်းကျန်းသူများထကြွမှုကြောင့် ပြဿနာမီးမောင်းထိုးရှာနေသူတွေ တောမီးလောင် တောကြောင်လက်ခမောင်းခတ်ဆိုသလို မီးလောင်ရာလေပင့်ရင်း ကိုယ်ကျိူးရှာ အမြတ်ထုတ် ပြဿနာဖန်တီးကြမည့် အရေး၊ မောင်တောဒေသကိစ္စနှင့် မသက်ဆိုင်သည့်တိုင် “ညိုညိုမြင်တိုင်း ခိုလို့ထင်”ဆိုသလို မြန်မာပြည်အနှံ့က လူနည်းစုဘာသာဝင်များကို အသားအရောင်-ကိုးကွယ်သည့်ဘာသာအရ အကြမ်းဖက်သမားအသွင် သံသယအဖြစ်စွတ်စွဲ စိတ်အနှောက်အရှက်ပေး ရမယ်ရှာရင်း ဒေသတွင်းမတည်ငြိမ်မှုများ ထပ်မံပေါ်ပေါက်အောင် လှုံဆော်လာမည့်အရေးတို့ကိုလည်း ပြည်သူတွေ အထူး စိုးရိမ်မကင်းဖြစ်လာရပြန်ပြီ။

သို့ပါ၍ ပြောင်းလဲချိန်တန်ပြီဟူသော ဆောင်ပုဒ်နှင့်အညီ သမ္မတကြီးနှင့် နိုင်ငံတော်အတိုင်ပင်ခံပုဂ္ဂိုလ်တို့၏ ဦးဆောင်မှုအောက်မှာ- မြန်မာပြည်အနှံ့ မှီတင်းနေထိုင်ကြသော မြန်မာနိုင်ငံသားများ၊ အခွန်ပေးဆောင်နေသော တိုင်းသူပြည်သားများ၊ အေးချမ်းစွာနေထိုင်ပြီး နည်းလမ်းအသွယ်သွယ်မှ အကျိူးပြုနေကြသော ဘက်ပေါင်းစုံမှ လူ့အဖွဲ့အစည်းများအားလုံး စိုးရိမ်မှုတွေပပျောက်၊ တရားဥပဒေလေးစားလိုက်နာ၊ ညီညွတ်စွာအတူလက်တွဲနေထိုင်၊ မတူကွဲပြားမှုတွေစု အင်အားအဖြစ် ကူနိုင်မှသာ ငြိမ်းချမ်းမှုဝေ၊တိုးတက်မှုထွေမည့် အနာဂတ်မြန်မာပြည်ဆီသို့ အမြန်ဆုံးလှမ်းနိုင်မည်ဖြစ်ပါကြောင်း စာရေးသူ အကြံပြုအပ်ပါသည်။ ။

ဒေါက်တာသိန်းမိုးဝင်း
The University of New South Wales (UNSW)
Sydney, Australia,

 



Comments are closed.