ဗုဒ္ဓဟူးနေ့မနက် နိုင်ငံတကာသတင်းများ

စက်တင်ဘာ ၁၉၊ ၂၀၁၈
M-Media

မလေးရှား ၀န်ကြီးချုပ်လောင်း အန်ဝါရ် အီဘရာဟင်

အရက်အဆိပ်သင့်မှုကြောင့် မလေးရှားတွင် ၁၅ ဦးသေဆုံး
==================
ကွာလာလမ်ပူဆင်ခြေဖုံးမှာ အရက်အဆိပ်ဖြစ်မှုကြောင့် အနည်းဆုံး ၁၅ ဦးသေဆုံးပြီး ၃၃ ဦး ဆေးရုံတင်ခဲ့ရတယ်လို့ မလေးရှားရဲတပ်ဖွဲ့က မနေ့မှာ ထုတ်ပြန်ပါတယ်။ Mandalay ၀ီစကီ၊ King Fisher ဘီယာနဲ့ Grand Royal ၀ီစကီတွေကြောင့်ဖြစ်ပြီး ထိခိုက်ခံစားရသူတွေဟာ မလေးရှားနိုင်ငံသား၊ နီပေါနိုင်ငံသားနဲ့ ဘင်္ဂလားဒေ့ရ်ှနိုင်ငံသားတွေ ဖြစ်ပါတယ်။ ဒီကိစ္စနဲ့ပတ်သက်ပြီး မလေးရှားရဲတပ်ဖွဲ့ဟာ နီပေါနိုင်ငံသားနဲ့ မြန်မာနိုင်ငံသားတို့ ဖွင့်လှစ်ထားတဲ့ ဆိုင်နှစ်ဆိုင်က အရက်မျိုးစုံ ဖာ ၂၀ ကို သိမ်းဆည်းခဲ့ပါတယ်။

အမေရိကန်နှင့် တရုတ်တို့ အပြန်အလှန်အခွန်များ တိုးမြှင့်
=============
အမေရိကန်ကနေ တင်သွင်းတဲ့ ကုန်ပစ္စည်း ဒေါ်လာ ဘီလီယံ ၆၀ ဖိုးကို စည်းကြပ်ခွန်ကောက်သွားမယ်လို့ တရုတ်က မနေ့မှာ ကြေငြာလိုက်ပြီး ဒါဟာ တနင်္လာနေ့မှာ အမေရိကန်က တရုတ်ပို့ကုန် ဒေါ်လာ ၂၀၀ ဘီလီယံအပေါ် အခွန်ကောက်မယ်လို့ ပြောကြားမှုကို တုန့်ပြန်တာလည်း ဖြစ်ပါတယ်။ တရုတ်က အခွန်စည်းကြပ်မယ့် ပစ္စည်းတွေထဲမှာ ဓာတ်ငွေ့အရည်၊ တစ်ချို့သော လေယာဉ်တွေ၊ ကိုကာအမှုန့်၊ အေးခဲဟင်းသီးဟင်းရွက်တွေ ပါဝင်ပါတယ်။ နှစ်နိုင်ငံစလုံးဟာ သူတို့ရဲ့အခွန်တွေကို စက်တင်ဘာ ၂၄ ရက်နေ့မှာ စတင်ကောက်ခံကြမှာဖြစ်ပါတယ်။

မဟာသီအတွက် အထူးနေရာတစ်ခု ဖန်တီးပေးမည်ဟု အန်ဝါရ်အီဘရာဟင်ပြော
=======================
ဝန်ကြီးချုပ် မဟာသီယာမိုဟာမက် ၂ နှစ်အပြီး ရာထူးကဆင်းသွားရင် အစိုးရအဖွဲ့မှာ ပြန်လည်ပါဝင်မှာ မဟုတ်တော့ပေမယ့် တိုင်းပြည်ကို ဆက်လက်ကူညီနိုင်ဖို့ သူ့အတွက် အထူးနေရာတစ်ခု ဖန်တီးပေးနိုင်တယ်လို့ မဟာသီနေရာကို ဆက်ခံမယ့် အန်န၀ါရ် အီဘရာဟင်က စင်ကာပူသတင်းဌာနက CNA ကို ပြောကြားလိုက်ပါတယ်။ ၀န်ကြီးချုပ်ဟောင်း နာဂျစ်ရာဇတ်ကို ဖြုတ်ချဖို့အတွက် နိုင်ငံရေးလောကကို ပြန်လည်ဝင်ရောက်လာတဲ့ မဟာသီဟာ ၀န်ကြီးချုပ်တာဝန်မှာ ၂ နှစ်သာ ထမ်းဆောင်မှာဖြစ်ပြီး သူနဲ့ နိုင်ငံရေး အတိုက်အခံဟောင်းဖြစ်ခဲ့တဲံ အန်ဝါရ် အီဘရာဟင်ကို နေရာပေးဖို့ စီစဉ်ထားတာ ဖြစ်ပါတယ်။ အန်ဝါရ်ကတော့ အရင်က သူတို့နှစ်ဦးကြားမှာ မကျေလည်မှုတွေရှိပေမယ့် လက်ရှိဆက်ဆံရေးဟာ လှိုက်လှိုက်လှဲလှဲရှိနေတယ်လို့ ထည့်သွင်းပြောဆိုခဲ့ပါတယ်။

Ref: CNA