အာဆီယံ ရေတပ်စစ်ရေးလေ့ကျင့်မှု မြန်မာပါဝင်မည်

သြဂုတ် ၂၈၊ ၂၀၁၉
M-Media

-လာမယ့်တစ်ပတ်မှာ ပြုလုပ်မယ့် အာဆီယံ ရေတပ်စစ်ရေးလေ့ကျင့်မှုမှာ မြန်မာရေတပ် ပါဝင်သွားမယ်လို့ စစ်တပ်ပြောရေးဆိုခွင့်ရှိသူက ဒီကနေ့မှာ ပြောကြားလိုက်ပြီး ဒီလိုပါဝင်တာဟာ အမေရိကန်က မြန်မာစစ်ခေါင်းဆောင်တွေအပေါ် ပြုလုပ်ထားတဲ့ ပိတ်ဆို့မှုတွေကို ချိုးဖောက်ရာရောက်မှာ မဟုတ်ဘူးလို့ ဆိုပါတယ်။

အဲဒီစစ်ရေးလေ့ကျင့်မှုကို ထိုင်းပင်လယ်ကွေ့မှာ စက်တင်ဘာ ၂ ရက်နေ့ စတင်မှာဖြစ်ပြီး အမေရိကန်ရေတပ်လည်း ပါဝင်မှာပါ။

“အာဆီယံအဖွဲ့ရဲ့ တစ်စိတ်တစ်ပိုင်းအဖြစ် လေ့ကျင့်မှုမှာ ပါဝင်ဖို့ ကျွန်တော်တို့ကို ဖိတ်ကြားထားပါတယ်” လို့ တပ်မတော် ကာကွယ်ရေးဦးစီးချုပ်ရုံးက ပြောရေးဆိုခွင့်ရှိသူ ဇော်မင်းထွန်းက ပြောကြားခဲ့ပါတယ်။

လေ့ကျင့်မှုဟာ ရာဇ၀တ်မှု၊ ပင်လယ်ဓားပြမှု တားဆီးရေး၊ ရေကြောင်းလုံခြုံရေးတွေကို အဓိကထားမှာဖြစ်ပါတယ်။ ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နဲ့ အခြား ထိပ်တန်း စစ်ဖက်အရာရှိ ၃ ဦးကို အမေရိကန်က ခရီးသွားလာခွင့် ပိတ်ပင်ထားတာနဲ့ အခု စစ်ရေးလေ့ကျင့်မှုဟာ သီးခြားစီဖြစ်တယ်လို့ ဇော်မင်းထွန်းက ထည့်သွင်းပြောကြားခဲ့ပါတယ်။

“ပိတ်ဆို့မှုက ပုဂ္ဂိုလ်ရေးကိစ္စပါ။ ဒီလေ့ကျင့်မှုက အာဆီယံနဲ့ အမေရိကန်တို့ ပူးပေါင်းဆောင်ရွက်မှုပါ”

လေ့ကျင့်မှုဟာ အမေရိကန်ရဲ့ အာဆီယံဒေသနဲ့ ဆက်ဆံမှု တိုးမြှင့်ရေး တစ်စိတ်တစ်ပိုင်းလည်း ဖြစ်ပါတယ်။

ဒီလို လေ့ကျင့်ခြင်းအားဖြင့် ဒေသတွင်းလုံခြုံရေးအတွက် အာဆီယံ နိုင်ငံအားလုံးနဲ့ ပူးပေါင်းဆောင်ရွက်နိုင်ဖို့ အခွင့်အလမ်းတစ်ခုဖြစ်တယ်လို့ အမေရိကန်အစိုးရရဲ့ ထုတ်ပြန်ချက်မှာ ဖော်ပြထားပါတယ်။

Ref: AFP