ရိုဟင်ဂျာဒုက္ခသည်များရှိ ကော့ဆက်ဘဇားခရိုင်ကို ဘင်္ဂလားဒေ့ရှ်က တံခါးပိတ်

ဧပြီ ၁၀၊ ၂၀၂၀
M-Media

-ရိုဟင်ဂျာဒုက္ခသည် သိန်းချီရှိတဲ့ ရခိုင်ပြည်နယ်နဲ့ ကပ်နေတဲ့ ကော့ဆက်ဘဇားခရိုင်ကို ဘင်္ဂလားဒေ့ရှ်က မနေ့မှာ လုံး၀တံခါးပိတ်လိုက်ပြီး ကိုရိုနာဗိုင်းရပ်စ် ပြန့်နှံ့မှုကို တားဆီးကာကွယ်ရေးအတွက် ဖြစ်တယ်လို့ အာဏာပိုင်တွေက ပြောပါတယ်။

ကော့ဆက်ဘဇားက ဒုက္ခသည်စခန်းတွေမှာ လက်ရှိအချိန်အထိ ဗိုင်းရပ်စ်ကူးစက်မှု မရှိသေးပေမယ့် လူဦးရေပြွတ်သိပ်နေတဲ့ အဲဒီနေရာတွေဟာ ရောဂါပြန့်နှံ့ရာနေရာတွေ ဖြစ်လာနိုင်တယ်လို့ ကျွမ်းကျင်သူတွေက သတိပေးထားတာပါ။

ရခိုင်ပြည်နယ်မြောက်ပိုင်းမှာ ၂၀၁၇ ခုနှစ်က ပြုလုပ်ခဲ့တဲ့ စစ်တပ်ရဲ့ စစ်ဆင်ရေးကြောင့် ရိုဟင်ဂျာ ၇ သိန်း ၄ သောင်းကျော်လောက် ဘင်္ဂလာဒေ့ရှး်နိုင်ငံကို ထွက်ပြေးခဲ့ရပါတယ်။ အဲဒီမတိုင်ခင်ကလည်း မြန်မာနိုင်ငံမှာ ဖိနှိပ်ညှင်းပမ်းမှုတွေကြောင့် ရိုဟင်ဂျာ ၂ သိန်းလောက်ဟာ ဘင်္ဂလားဒေ့ရှ်မှာ ဒုက္ခသည်အဖြစ် နေထိုင်နေရတာ ဖြစ်ပါတယ်။

ကော့ဆက်ဘဇားခရိုင်မှာမှာ ရိုဟင်ဂျာဒုက္ခသည်တွေအပါအဝင် လူဦးရေ ၃.၄ သန်းလောက် ရှိနေတာပါ။

အခြေအနေတွေတိုးတက်တဲ့အထိ ခရိုင်အတွင်းကို မည်သူမှမဝင်ရ၊ မည်သူမှ မထွက်ရလို့ အစိုးရရဲ့ ညွှန်ကြားချက်မှာ ပါဝင်ပြီး ဘင်္ဂလားဒေ့ရှ်စစ်တပ်နဲ့ ရဲတပ်ဖွဲ့တို့ ပူးပေါင်းကာ စောင့်ကြည့် ထိန်းချုပ်သွားမှာ ဖြစ်ပါတယ်။

ကုလရဲ့ ဒုက္ခသည်များ ကူညီထောက်ပံ့ရေးအဖွဲ့ UNHCR က တာဝန်ရှိသူ မဟ်ဘူးဘ် အလန် တာလွတ်က်ဒါက အကူအညီပေးရေး လုပ်သားတွေအပေါ်မှာပါ လှုပ်ရှားသွားလာမှု ကန့်သတ်ထားပြီး ဝန်ထမ်းအရေအတွက်ကို ၈၀ ရာခိုင်နှုန်းအထိ လျော့ချထားတယ်လို့ ပြောကြားခဲ့ပါတယ်။

ဘင်္ဂလားဒေ့ရှ်မှာ လက်ရှိ ကိုရိုနာဗိုင်းရပ်စ် ကူးစက်သူ အရေအတွက်ဟာ ၂၀၀ ကျော်လာခဲ့ပြီး သေဆုံးသူက ၂၀ ရှိနေပါတယ်။

Ref: CNA