4 years ago
ရိုဟင်ဂျာ ၇ ဦးကို အိန္ဒိယနိုင်ငံက မြန်မာကို ပထမဆုံးအကြိမ် ပြန်ပို့
4 years ago
ဓာတ်ပြားအဆိုတော် တေးသံရှင် ဒေါ်မာမာဝေ အသက်(၉၃) နှစ် ကွယ်လွန်
4 years ago
ဒုက္ခသည်စခန်းမှ လုပ်အားပေးဆရာမတစ်ဦး ရခိုင်မှ ရန်ကုန်သို့လာစဉ် လဝကဥပဒေဖြင့် အဖမ်းခံရပြီး ထောင်တစ်နှစ်ကျ
4 years ago
ဦးဇော်ဌေး (ခ) မှူးဇော်အား ဌာနပြောင်းရွှေ့တာဝန်ပေး
4 years ago
NVC ကဒ် လက်ခံရန် ဖိအားပေးခံရမှုကို ငြင်းဆိုသော ကမန်တိုင်းရင်းသားများ စီးပွားရေးပိတ်ဆို့ခံနေရ
5 years ago
ASEAN ထိပ်သီးများ ရိုဟင်ဂျာအရေး ဆွေးနွေး
5 years ago
Drone မှုနဲ့ဖမ်းခံရသူ သတင်းထောက်တွေ မိသားစုနဲ့တွေ့ခွင့်မရသေး
5 years ago
မြန်မာ-ဘင်္ဂလားဒေ့ရှ် သဘောတူညီချက် (၁၀)ချက် လက်မှတ်ရေးထိုး
5 years ago
AA ဒုဗိုလ်မှူးကြီး အပါအ၀င် ၉ ဦးကို ငွေကြေးခ၀ါချမှုနဲ့ အမှုဖွင့်စစ်ဆေး
5 years ago
ဘာသာပေါင်းစုံ ဆုတောင်းပွဲ (ရုပ်သံ)

ဇူလိုင်-၂၅၊၂၀၁၃
M-Media
တင်မင်းထွဋ်

မြန်မာ့ရိုးရာခြင်းလုံး သမိုင်းနှင့် တိုင်းရင်း မွတ်စလင်မ်များ၏ အခန်းကဏ္ဍ

ရန်ကုန်မြို့ လယ်တနေရာတွင် ခြင်းလုံးခတ်ကစားနေကြသော ခြင်းဝိုင်းလေးကို အမှတ်မထင် တွေ့ရှိခဲ့သည်။ လွန်ခဲ့သောနှစ်များစွာက ခြင်းလုံးခတ်ကစားပွဲလေးများကို လမ်းတိုင်းတွင် မကြာခဏတွေ့ရလေ့ရှိသည်။ ယနေ့မြို့ပြ၏ ထူထပ်လှသောလူဦးရေနှင့် မြေနေရာရှားပါးမှုများသည်လည်း လူမှုဘ၀များကို အနည်းနဲ့ အများ ထိခိုက်လာခဲ့ကြသည်။

ခြင်းလုံးမြေကျမှာကို အလွန်နှမြောစိုးရိမ်ကာ တဦးနှင့်တဦးအချိတ်အဆက်မိမိ ကစားနေကြသော ခြင်းဝိုင်းထဲက ဦးမျိုးဆွေက “ခြင်းလုံးကစားရာတွင် တဦးတယောက်ထဲက လေး၊ငါးချက်တော့ထားခြင်း၊ ဆွဲထားခြင်းပြုလုပ်၍ မရကြောင်း တကိုယ်ကောင်းဆန်သော ကစားခြင်းမျိုးပြုလုပ်၍ မရကြောင်း’’ ရှင်းပြသည်။နယ်မြို့များတွင်ပါ ခြင်းလုံးခတ်ကစားပွဲများ နည်းပါးလှပြီဖြစ်သော ခြင်းလုံး၏သမိုင်းသည် ပျူခေတ်ကပင် စတင်ခဲ့ကြောင်း တွေ့ရှိခဲ့ရသည်။
ပျူခေတ်ကငွေခြင်းလုံး

မြန်မာပြည်ရှေးဟောင်းသုတေသနဋ္ဌာနမှ ကျောက်စာဝန် မစ္စတာဒူရွိုင်ဇယ်၏ ညွှန်ကြားချက်အရ ၁၉၂၆-၂၇ခုနှစ် အတွင်းက ပြည်ခရိုင်မှော်ဇာမြို့ ကုလားကန်ကုန်းရွာအနီးရှိ ခင်ဗကုန်းတွင် တူးဖော်ဆောင်ရွက်ရာတွင် ရုပ်တု၊ဆင်းတု၊ ရွှေစေတီ၊ ငွေစေတီ၊ ရွှေပေစာ စသည်တို့ပါဝင်သော ဋ္ဌာပနာပစ္စည်းမျိုးစုံကို ဖော်ထုတ်တွေ့ရှိရာ ငွေဖြင့်ပြုလုပ်ထားသည့် ခြင်းလုံးကလေးတလုံးပါရှိကြောင်း သိရှိရသည်။

(အိန္ဒိယနိုင်ငံရှေးဟောင်းသုတေသနဋ္ဌာန၊ ၁၉၂၆-၂၇ခုနှစ်၊ နှစ်ချုပ်အစီအရင်ခံစာ၊ စာမျက်နှာ ၁၈၁)

အင်းဝခေတ်နှင့်ခြင်းလုံး

၁၇၈၂ခုနှစ်တွင် မြန်မာနိုင်ငံအင်းဝနေပြည်တော်သို့ သာသနာပြုလုပ်ငန်းဖြင့် ရောက်ရှိလာသော အီတလီနိုင်ငံမှ ဗရင်ဂျီဘုန်းတော်ကြီး စန်ဂါမနို (Sangermano)၏ မှတ်တမ်းတွင်

“မြန်မာနိုင်ငံတွင် ကစားကြသည့်ကစားနည်းများမှာ ခုံညင်းထိုးခြင်း၊ ဆင်စွယ် ဖဲကစားခြင်း၊ ကြက်တိုက်ခြင်း တို့အပြင် ကိုယ်လက်လှုပ်ရှားကျန်းမာရေးကစားနည်းအမျိုးမျိုးတို့အနက်မှ ၀ါးကိုလွှာ၍ပြုလုပ်သောအလုံးကို လက်ဖြင့်မပုတ်ဘဲ ခြေထောက် ရိုက်ခတ်ကစားခြင်း ပြုလုပ်သည့်ကစားနည်းတွင် လူငယ်လူရွယ်များ အချိန်အတော်ကြာအောင် အတူတကွခတ်ကစားကြသည်။’’

(၁၈၃၃ခုနှစ်တွင် ရိုက်နှိပ်ထုတ်ဝေသော The Burmese Empire စာမျက်နှာ ၁၃၁၊ အမှတ်စဉ် ၂၉)

ကုန်းဘောင်ခေတ်

၁၈၇၄-၇၅ခုနှစ်တွင် အိန္ဒိယနိုင်ငံမှ မြန်မာနိုင်ငံသို့ ရောက်ရှိလာသော အင်္ဂလန်နိုင်ငံမှ ခွဲစိတ်ဆရာဝန်ကြီး C.A.Gordon ၏ မှတ်တမ်းတွင် “ပြည်မြို့တွင် ကျွန်ုပ်ရှိနေစဉ်အခါ ဂတ်တဲအနီးတွင် ဗမာလူမျိုးလေးဦး ခြင်းလုံးခတ်ကစားနေကြသည်ကို တွေ့မြင်ရသည်။ ကျွန်ုပ်တို့၏ ဘောလုံးကစားနည်းဟန်အတိုင်း သူတို့သည် ဖျတ်လတ်စွာ ခတ်ကစားနေကြသည်ကို တွေ့ရပြီး ယင်းအလုံးသည် အခေါင်းပွ ၀ိုင်းဝန်းသောသဏ္ဍန်ရှိသည်။

ကစားသူများသည်လုံချည်ကို ခါးတောင်းကျိုက်၍ ကိုယ်တုံးလုံးဖြင့်ခတ်ကစားနေကြသည်ကို တွေ့ရ၏။ ထိုကဲ့သို့ပြုမှုခြင်းသည် တနည်းအားဖြင့် ထိုခေတ်အခါကဗမာလူမျိုးတို့ ဂုဏ်ယူကြသော ထိုးကွင်းမင်ကြောင်များကို ပေါ်လွင်ထင်ရှားစွာ တွေ့မြင်နိုင်စေရန်ဖြစ်ကြောင်း သုံးသပ်ရပေသည်။’’

ခေတ်နှောင်းပိုင်း

အိမ်တော်ရာ ဘုရားဝင်း

ခရစ်နှစ်၁၉၀၀ပြည့်နှစ်လောက်မှစ၍ မန္တလေးမြို့ အိမ်တော်ရာဘုရားဝင်းအတွင်း၌ နာမည်ကျော်အပျော်တမ်းခြင်းဝိုင်း တစ်ဝိုင်းရှိခဲ့သည်။ ခြင်းလုံးခတ်တော်သူများလာရောက်၍ ကစားကြရာတွင် တိုင်းရင်းသားမွတ်စလင်မ်များလည်း ပါဝင်ခဲ့သည်။

 ဗလီဝင်းမှခြင်းဝိုင်း

လွန်ခဲ့သောနှစ်ပေါင်း(၇၀)ကျော်က မန္တလေးမြို့ လမ်း၃၀နှင့်၃၁လမ်းကြား၊ တောင်ပလူဗလီဝင်းထဲ၌ ညနေတိုင်းအပျော်ခတ် ကစားကြသည့် ခြင်းဝိုင်းများရှိခဲ့လေသည်။၎င်းဝိုင်းများတွင် တိုင်းရင်းသားမွတ်စလင်မ်များနှင့်ဗုဒ္ဓဘာသာဝင်များ ပူးတွဲ၍ အတူတကွကစားခဲ့ကြသည်။ ချမ်းမြေ့သာစည်ရပ်ကွက်မှ “ပြည်တော်သာ’’အမည်ဖြင့် ကိုသိန်းမောင်နှင့်ဦးဟာမက်တို့ ဦးစီးသော တိုင်းရင်းသားမွတ်စ်လင်မ်ခြင်းအဖွဲ့ တစ်ဖွဲ့တည်ထောင်ခဲ့ကာ မန္တလေးမြို့၌ နှစ်စဉ်ကျင်းပသော မဟာမြတ်မုနိဘုရားကြီး ၀ါဆိုပန်းကပ်ခြင်းယိုင်အလှခတ်ဧည့်ခံပွဲများတွင် ပါဝင်ဆင်နွှဲခဲ့ကြပြီး အခြားပြိုင်ပွဲနှင့် အလှူဖိတ်ပွဲများ၌လည်း ခတ်ကစားခဲ့ကြသည်။

ဗ.မ.က ခြင်းခတ်ပြိုင်ပွဲ (ဗမာမွတ်စ်လင်မ်ကွန်ဂရက်)

၁၉၅၃ခုနှစ်၊ဧပြီလ(၁၀)ရက်နှင့်(၁၁)ရက်တွင် မန္တလေးမြို့ အမှတ်(၃) အ.ထ.က ကျောင်းဝင်းအတွင်း မန္တလေးခရိုင်ဗမာမွတ်စလင်မ်ကွန်ဂရက်(ဗ.မ.က)က ဦးစီးကျင်းပသော ခြင်းလုံးခတ်ပြိုင်ပွဲကျင်းပခဲ့သည်။ ပြည်ထောင်စုမြန်မာနိုင်ငံတော် တရားရေးရာဋ္ဌာနနှင့်ကျန်းမာရေးဝန်ကြီး ဦးခင်မောင်လတ် မှ ဆုဖလားနှင့်ဂုဏ်ထူးဆောင် လက်မှတ်များ ချီးမြှင့်ခဲ့သည်။

တရုတ်ပြည်သူ့ သမ္မတနိုင်ငံသို့ သွားရောက်ကစားခြင်း

၁၉၆၁ခုနှစ်အောက်တိုဘာ၂ရက်နေ့တွင် တရုတ်မြန်မာနယ်ခြားသတ်မှတ်သည့်စာချုပ်လက်မှတ်ရေးထိုးသော အခမ်းအနားကို ကျင်းပခဲ့လေသည်။ထိုအခမ်းအနားသို့ မြန်မာအားကစားအဖွဲ့ များ လိုက်ပါသွားကာ မြန်မာ့လက်ရွေးစင် ခြင်းသမားများမှာ ရန်ကုန်တိုင်းမှ ဦးစံလှနှင့်ကိုအောင်ကြွယ်၊ မန္တလေးတိုင်းမှ ခြင်းဦးဘသိန်းနှင့်ကိုကျော်ကျော်၊ မြင်းခြံခရိုင်မှ ကိုအောင်အောင်နှင့် ကိုဗိုစီ တို့ဖြစ်ကြသည်။ ၎င်းလက်ရွေးစင်ခြင်းအဖွဲ့မှ ခတ်သားတစ်ယောက်ဖြစ်သည့် ခြင်းဦးဘသိန်းသည် တိုင်းရင်းသားမွတ်စလင်မ်ဖြစ်သည်။

ထင်ရှားသော တိုင်းရင်းသားမွတ်စလင်မ်များ

ဦးဘသိန်း (ပီကင်းပြန်)

၁၉၇၂ခုနှစ်တွင် (၄၄)ကြိမ်မြောက် ၀ါဆိုပန်းကပ်ခြင်းယိုင်အလှခတ်ပွဲကြီးမှစတင်ကာ “ပသီခြင်းအဖွဲ့’’ အမည်ဖြင့် ခြင်းဦးဘသိန်း(ပီကင်းပြန်) ဦးစီးသော တိုင်းရင်းသား မွတ်စလင်မ်ခြင်း အဖွဲ့ တည်ထောင်ခဲ့သည်။ ၎င်းပွဲ၌ ခတ်ကစားကြသူများမှာ-

၁။ဦးဘသိန်း(ပီကင်းပြန်)
၂။ ဦးခလေး
၃။ ကိုအေးမောင်
၎။ ကိုစလေမံ
၅။ ကိုစအစ် ခေါ် ကိုခင်မောင်
၆။ ကိုဗိုလ်ကြီး တို့ဖြစ်ကြသည်။

patichin04

၁၃၄၄-ခု၊ (၄၄)ကြိမ်မြောက် ၀ါဆိုခြင်းပွဲ၊ မန္တလေးမဟာမြတ်မုနိဘုရားကြီး၊ အရှေ့ ၄၅-တာကွင်း၌ ဒုတိယ၀ါဆိုလပြည့်နေ့ညနေ (၃း၂၀)နာရီအချိန်တွင် “ပသီ”ခြင်းအဖွဲ့ ခြင်းယိုင် အလှခတ် ကစားနေစဉ်
(25.7.72)

ဦးဘသိန်းသည် ငယ်စဉ်ကျောင်းသားဘ၀ကတည်းက ခြင်းခတ်ဝါသနာပါခဲ့သူ တစ်ယောက်ဖြစ်ကာ ၁၉၄၂ခုနှစ် ဒုတိယကမ္ဘာစစ်တွင် စဥ့်ကိုင်မြို့နယ် ဟင်းငူရွာသို့ မိသားစု စစ်ပြေးသောအခါ ခြင်းလုံးများကိုပါ သယ်ယူသွားသည်အထိ ၀ါသနာကြီးမားလွန်းခဲ့သည်။ စစ်ပြေးဘ၀နှင့်ပင် ခြင်းခတ်မပြတ်ခဲ့ပေ။

၁၉၆၀ ပြည့်နှစ် ရန်ကုန်အောင်ဆန်းကွင်းတွင် ကျင်းပသည့် ခြင်းညီလာခံ၌ မန္တလေး၊ ခရိုင်ခြင်းအဖွဲ့ကို အလှခတ်စေပြီး ကိုယ်တိုင်အော်၍ အမှတ်ပေးသည့် မူစနစ်ကိုတင်ပြခဲ့ရာ အဖွဲ့ချူပ်က လက်ခံအတည်ပြုပြီး ယနေ့တိုင် ဦးဘသိန်းတီထွင်သောစနစ်ဖြင့် အမှတ်ပေးလျက်ရှိသည်။ ၁၉၅၉-ခုနှစ် မန်းရာပြည့်ပွဲတော်ကြီးကို ရာပြည့်ကွင်း၌ ၁၀ ညကျင်းပခဲ့ရာ မန္တလေးခရိုင် ချင်းအဖွဲ့မှ အလှခတ်ပွဲများဖြင့် ဖြေဖျော်သည်။

ဦးဘသိန်းသည် မြန်မာမှုကို မြတ်နိုးသည့် မြန်မာ မွတ်စလင်ကြီးဖြစ်သည်။ မြန်မာမှုအနုပညာနှင့်ပတ်သက်၍ နိုင်ငံကို အကျိုးပြုခဲ့သည်။ ထို့ကြောင့် ဆရာကြီး ဦးမောင်မောင်တင် (မဟာဝိဇ္ဇာ)ကပင်- ‘ခြင်းဦးဘသိန်းသည် မန္တလေးသားဖြစ်သည်။ တိုင်းရင်းသား မြန်မာ မွတ်စလင်အမျိုးသားဖြစ်သည်။ သို့တစေ တကယ့် မြန်မာ့စိတ် မြန်မာ့ ဟန်နှင့် နေထိုင်သူ ဖြစ်သည်။   မြန်မာစာပေ၊မြန်မာ အနုပညာကို လေးစားသည်။ ခြင်းလုံးနှင့်ပတ်သက်သောစာဟူသမျှ ရှာကြံသည်။ဖတ်သည်။’ဟု လည်းကောင်း၊’ တစ်ဖန် ၁၉၆၉-ခုနှစ်တွင် ပုံနှိပ်သော ဆဋ္ဌမတန်း၊ မြန်မာဖတ်စာသင်တွင် သရေခေတ္တရာမှ ရသောငွေခြင်းလုံးနှင့် စပ်လျဉ်းပြီး ဘောဘောကြီးစေတီ ဌာပနာမှမဟုတ်ကြောင်း၊ ၁၉၂၆ ခုနှစ် ပြည်ခရိုင်မှော်ဇာမြို့နယ် ခင်ဗကုန်းမှရသောခြင်းလုံးဖြစ်ကြောင်း၊ ၁၅-၃-၇၀ နေ့ထုတ် ဟံသာဝတီသတင်းစာတွင်လည်း ကျောင်းသူကျောင်းသားများအတွက် အမှန်ကို ပြုပြင်ပေးရန် တင်ပြခဲ့လေသည်။ ပညာရေးဌာနသို့လည်း အခါအားလျော်စွာ အကြံပြုသည်သာ’ဟု လည်းကောင်း သုံးသပ်တင်ပြခြင်းဖြစ်သည်။ ဦးဘသိန်းသည် ခြင်းခတ် ပညာရှင်သာမက သုတေသီကြီးလည်း ဖြစ်ကြောင်း ထင်ရှားပါသည်။

(တိုင်ရင်းသားမွတ်စ်လင်မ်စာပြုစာဆို ပုဂ္ဂိုလ်များကျော်များ-၂    ပါမောက္ခဒေါက်တာအောင်ဇော်)

ဦးကရင် (U KARIM)

U KaYin

၁၉၂၅ခုနှစ် ဒီဇင်ဘာလ၂၈ရက်နေ့တွင် “ဗုဒ္ဓဘာသာခြင်းလုံးခတ်အသင်း’’ ကို တည်ထောင်ခဲ့ကြသည်။ မြန်မာနိုင်ငံတွင် ပထမဦးဆုံးတည်ထောင်သော အသင်းဖြစ်သည်။ ပထမဦးဆုံးဥက္ကဋ္ဌမှာ ဘကြီးလှဖြစ်၍ အတွင်းရေးမှူးမှာ ဦးကရင် (U KARIM)ဖြစ်သည်။ ခြင်းလုံးခတ်ကစားရာတွင် ကျောနောက်မှ ရှေ့သို့ကျလာသော ခြင်းလုံးကို နောက်လှည့်မကြည့်ဘဲ အမှန်းအဆနှင့် ခေါင်းငုံ့ရှောင်ကာ ရှေ့ကျလာမှ မိအောင် ခတ်ကစားသောခြင်းကွက်ကို “ခြင်းပျောက်ရှာသည်’’ ဟုခေါ်လေသည်။ ထိုသို့ခြင်းပျောက်ရှာ၍ခတ်သောကစားကွက်ကို ဦးကရင်မှ စတင်ကာ တီထွင်ကစားခဲ့လေသည်။

ဦးဒွလ်လာ (တောင်အိုးဘို ဗလီဒကာ)

mdy buudish chin lone

စစ်ကိုင်းတန်း ဧချိုင့်ရပ်မှ ဆေးဆရာ ဦးဒွလ်လာသည် အိမ်တော်ရာခြင်းဝိုင်း၌ ခတ်ကစားခဲ့သူဖြစ်သည်။

ဦးဒွလ်လာသည် ခြင်းခတ်ကစားရာတွင် ဟန်အမူအရာကြွကြွ ရွရွဖြင့် ခြင်းခတ်ကစားနိုင်သူတယောက်ဖြစ်ကာ ခြင်းဆိုင်းတီး၍ ခတ်ကစားရသော အလှူပွဲ၊ ဘုရားပွဲ၊ ကထိန်ပွဲများကျင်းပရာတွင် “ဗုဒ္ဓဘာသာခြင်းအဖွဲ့’’ နှင့် အကြိမ်ပေါင်းများစွာ ပါဝင်ခတ်ကစားခဲ့လေသည်။

 အောင်မြင်ကျော်ကြား ခတ်ကစားသမားများ

မန္တလေးမြို့ညွှန်ပေါင်းဈေးအနီး၃၅လမ်းတွင် နေထိုင်သော ညီအစ်ကိုနှစ်ဦးဖြစ်သည်။ အစ်ကိုဖြစ်သူဦးကာမှာ ထိုင်ပြီးခြင်းခတ်ရာတွင် အထူးကျွမ်းကျင်ကာ ခြင်းဝိုင်းအလည်၌ ထိုင်နေစဉ် အခြားခတ်သား ၄-၅ဦးက ၀ိုင်းပြီးခြင်းပို့ပေးကြရာတွင် မလွတ်တမ်းခတ်ကစားနိုင်သူဖြစ်သည်။ ၎င်းတို့နှင့်ခတ်ကစားဘက်များတွင် ဦးဟာမက်ဆိုသူမှာလည်း ခြင်းမြဲသူတစ်ယောက်ပင်ဖြစ်၍ ၎င်းဘက်မှခြင်း မြေကျနည်းလေသည်။

စိန်ပန်းတောင်ပိုင်း၊ ပန်းဆက်တံတားမှ ဦးဟာမြင်၊ “နိုင်ငံညွန့်’’ခြင်းအဖွဲ့ မှ ဦးအောင်ဘနှင့် တွဲဖက်ကစားသော ကိုဘဇင်တို့မှာလည်း လူကြိုက်များခဲ့သော ကစားသမားများဖြစ်သည်။ ၁၉၃၅-၃၆ ခုနှစ်လောက်က မန္တလေးမြို့ ၂၈လမ်း လှည်းယဉ်တန်းရပ်မှ ဦးရာကွက်သည် မဟာဒူးခတ်ရာတွင် ပိုင်နိုင်ပြီး လိုရာသို့ ရောက်အောင်ပေးပို့ကစားနိုင်သဖြင့် နာမည်ရခဲ့သည်။

ma har du

(ဓါတ်ပုံ ခြင်းလုံးခတ်ကစားခြင်းသမိုင်း ဦးဘဇော်ရေး)

ခြင်းလောက၏ အသွေးအရောင်စုံ ရှေ့ဆောင်များ

အချုပ်အားဖြင့်ဆိုရသော်  အရောင်အသွးစုံ၊ လူမျိုးဘာသာမခွဲခြား စုရုံးလုပ်ဆောင်ခဲ့မှုများသည် အောင်မြင်မှုအထွတ်အထိပ်ကိုသာ ရောက်ရှိခဲ့သည်ကိုသာတွေ့ရသည်။ ယနေ့နားခါးနေကြသည့် သမိုင်းစကားများ၊ လုပ်ရပ်များကိုတော့ ဖျောက်ဖျက်၍မရပေ။ သမိုင်းအဆက်ဆက် လုပ်ရပ်အကောင်းအဆိုးသည် သက်သေများအဖြစ် အစဉ်ရှင်သန်နေပါတော့သည်။

တင်မင်းထွဋ်
၂၀-ဇူလိုင်-၂၀၁၃

ကိုးကားစာ စာရင်း

  1. ခြင်းလုံးခတ်ကစားခြင်းသမိုင်း                                        ဦးဘဇော်
  2. မြန်မာ့ခြင်းလုံးသမိုင်း (စာပေဗိမာန်ဆုရ)                           ခြင်းဦးဘသိန်း (ပီကင်းပြန်)
  3. တိုင်းရင်းသားမွတ်စလင်နှင့်ခြင်းလုံး                                  မဟာနွယ်
  4. (အစ္စလာမ်ဓမ္မဗိမာန်(နှစ်၃၀) ပြည့်အထူးထုတ်စာစောင်)
  5. တိုင်ရင်းသားမွတ်စ်လင်မ်စာပြုစာဆို ပုဂ္ဂိုလ်များကျော်များ-၂    ပါမောက္ခဒေါက်တာအောင်ဇော်

** မေတ္တာရပ်ခံ အသိပေးခြင်း M-Media ၏ မူပိုင် ပိုစ်များကို အွန်လိုင်းမီဒီယာများတွင် ဖော်ပြလိုလျှင် Credit အပြည့်အစုံပေးရန်နှင့် စီးပွားဖြစ် တည်ထောင်လုပ်ကိုင်သော  အွန်လိုင်း ၊ Offline မီဒီယာများ အသုံးပြုလိုလျှင် M-Media သို့ ဆက်သွယ်ရန်လိုမည်ဖြစ်ကြောင်း လေးစားစွာဖြင့် အသိပေးအပ်သည်။

Leave a Reply