သံတွဲ NLD သို့ ဘာသာရေး ပဋိပက္ခဖြစ်စေရန် ရေးသားထားသော စာတစ်စောင် ရောက်ရှိ

သြဂုတ်၊ ၂၈၊ ၂၀၁၂

YPI မှ ကူးယူဖော်ပြသည်။

လွန်ခဲ့သောနှစ် ၃၀ ခန့်က ဘာသာရေးပဋိပက္ခများဖြစ်အောင် လှုံ့ဆော်ထုတ်ဝေခဲ့သော စာအား ကိုးကားရေးသားထားသော စာတစ်စောင်ကို ယမန်နေ့က စာတိုက်မှတစ်ဆင့်ရရှိခဲ့ကြောင်း သံတွဲမြို့နယ် NLD အတွင်းရေးမှူးကပြောသည်။

သံတွဲမြို့ကိုကယ်တင်ပါ ဟု ခေါင်းစဉ်တပ်ထားသော အဆိုပါစာတွင် ဘင်္ဂါလီမွတ်စလင်များက ဗုဒ္ဓဘာသာ မိန်းကလေးများကို သိမ်းသွင်းလက်ထပ်နေမှုအားစိုးရိမ်ကြောင်းဖော်ပြထားပြီး အစ္စလာမ်ဘာသာနှင့် ပတ်သက်ပြီးမှားယွင်းသည့်အယူအဆများပါရှိကြောင်း NLD ပါတီဝင်တစ်ဦးက ပြောသည်။

“ရန်ကုန်က ပို့တာပါ။ စာအိတ်မှာ ပေးသူအမည်က မထင်ရှားဘူး။ အတွင်းကစာမှာလည်း မြန်မာ နိုင်ငံသားတစ်ဦးလို့ပဲ ရေးထားတယ်” ဟု ၎င်းက ပြောသည်။သံတွဲသို့ရောက်ရှိလာသော ပေးပို့သူအမည် သဲကွဲစွာမပါရှိသည့်စာအိတ် သြဂုတ် ၂၂ ရက်စွဲဖြင့် ပေးပို့သော စာတိုက်တံဆိပ်တွင် စာရွေးစာပို့စခန်း၊ စာရွေး ၃ ဟု ရိုက်နှိပ်ထားသည်။

ပူးတွဲပေးပို့သော လှုံ့ဆော်စာမှာ မွတ်စလင်များနှင့် ဗုဒ္ဓဘာသာဝင်များအကြား ပဋိပက္ခဖြစ်စေရန် လုပ်ကြံထားသောစာဖြစ်ကြောင်း အသက် ၆၅ နှစ်အရွယ် သံတွဲဒေသခံတစ်ဦးက ပြောသည်။

“ဒါက ၁၉၈၀ ကျော်လောက်က ဖြန့်ခဲ့တဲ့စာတွေပါ။ (၁၉၈၀ က) သံတွဲမှာ ဒီစာတွေဖြန့်လို့ ဖမ်းဆီးမိခဲ့တဲ့သူတွေဟာ မွတ်စလင်တွေမဟုတ်ပါဘူး”ဟု ပြောသည်။

သံတွဲမြို့နယ် NLD ပါတီဝင်တစ်ဦးကလည်း “ ဒီစာကို ဘာကြောင့်ပို့သလဲဆိုတာကို ရှင်းရှင်းလင်းလင်း မပြောထားတဲ့အတွက် လှုံ့ဆော်စာ သက်သက်ဖြစ်နေပါတယ်။ နောက်ထပ်ဘယ်နေရာတွေကို ပို့ထားသလဲဆိုတာက စိုးရိမ်စရာပါ ” ဟု ပြောသည်။

ပြီးခဲ့သည့်ဇွန်လအတွင်းက ရခိုင်ပြည်နယ်အတွင်းဖြစ်ပွားခဲ့သော ပဋိပက္ခများကြောင့် လူပေါင်း ၈၀ နီးပါး သေဆုံးကာ ၆၄,၀၀၀ ၀န်းကျင် အိုးအိမ်မဲ့ဘ၀ရောက်ခဲ့ရသည် ဟုအစိုးရစာရင်းများကဆိုသည်။