“အစ္စလာမ် ဘာသာဝင်ဖြစ်လို့ နိုင်ငံသား အခွင့်အရေး နည်းနည်းလေးမှ လျော့တာ လက်မခံဘူး” လို့ ကိုမြအေးပြော

ဒီဇင်ဘာ ၂၉ ၊ ၂၀၁၆
သူရိန်
M-Media

အစ္စလာမ်ဘာသာဝင်ဖြစ်တဲ့အတွက် နိုင်ငံသား အခွင့်အရေး ပိုပေးဖို့ မတောင်းဆိုဘူးလို့ ၈၈မျိုးဆက်ကျောင်းသား ခေါင်းဆောင် ဦးမြအေးက ပြောကြားလိုက်ပါတယ်။

ဒေါ်စောရွှေခန်းမ မှာ ယနေ့ပြုလုပ်ခဲ့တဲ့ မင်္ဂလာတောင်ညွန့်မြို့နယ် အစ္စလာမ်သာသနာရေးရာကောင်စီ မှ စီစဉ်ကျင်းပတဲ့ မဟာတမန်တော်နေ့ အထိမ်းအမှတ်နှင့် အစ္စလာမ်ကောင်စီနေ့ အခမ်းအနားမှာ အထက်ပါအတိုင်းပြောကြားခဲ့တာပါ။

“မြန်မာနိုင်ငံသားတစ်ယောက်ဖြစ်တယ်၊ ကျွန်တော်ကိုးကွယ်တဲ့ ဘာသာဟာ အစ္စလာမ်ဘာသာဖြစ်တယ်၊ အစ္စလာမ်ဘာသာဝင်ဖြစ်တဲ့ အတွက်ကြောင့်မို့လို့ နိုင်ငံသားအခွင့်အရေး ပိုပြီးတော့ ပေးပါလို့ ကျွန်တော်မတောင်းဆိုဘူး။ ဒါပေမယ့် နိုင်ငံသားအခွင့်အရေးရဲ့နည်းနည်းလေးမှ လျော့တာကိုလည်း လက်မခံဘူး” ဟု ၎င်းက ပြောပါတယ်။

မိမိတို့ မျိုးဆက်တွေမှာ တတိယ၊ စတုထ္ထ မျိုးဆက်တွေ ဖြစ်နေလျက် NVC ထုတ်ပေးမယ်ဆိုတာ ဘယ်လို အကြောင်းပြချက်နှင့်မှ လက်မခံကြောင်း ကိုမြအေးက ပြောပါတယ်။

ဒါ့အပြင် ခိုးဝင်လာသူများနှင့် ပတ်သက်၍လည်း “ခိုးဝင်လာသူရှိရင်ဖမ်းပါ၊ ကျွန်တော်တို့လည်း ဝိုင်းဖမ်းပေးမယ်၊ ခိုးဝင်လာတဲ့သူထဲမှာ အစ္စလာမ်လည်း ဖြစ်ချင်ဖြစ်မယ်၊ ဗုဒ္ဓဘာသာလည်း ဖြစ်ချင်ဖြစ်မယ်၊ ခရစ်ယာန်လည်း ဖြစ်ချင်ဖြစ်မယ်။ ဘာသာလူမျိုး မခွဲခြားဘဲနဲ့ ဖမ်း၊ ဝိုင်းဖမ်းပေးမယ်”လို့ ဦးမြအေးက ဆိုပါတယ်။

အဆိုပါ အခမ်းအနားတွင် စာရေးဆရာ ဝါးခယ်မမောင်မင်းနိုင်က မဟာတမန်တော်မြတ် အကြောင်း ဟောပြောတင်ပြီး ပြည်သူ့ လွှတ်တော် ကိုယ်စားလှယ် ဒေါ်ဖြူဖြူသင်း၊ တိုင်းဒေသကြီး လွှတ်တော် ကိုယ်စားလှယ် ဦးလှဌေး၊ ဒေါက်တာမြင့်သိန်း(ငြိမ်းချမ်းလုလင်) တို့က ဧည့်သည်တော် ဂုဏ်ပြုစကားများ အသီးသီး ပြောကြားခဲ့ကြောင်း သိရပါတယ်။