ဂါဇာတွင် အစ္စရေးက တိုက်ခိုက်သတ်ဖြတ်မှုများ ဆက်လုပ်

ဒီဇင်ဘာ ၁၊ ၂၀၂၃

M-Media 

-အစ္စရေးနဲ့ ဟားမက်စ်တို့အကြား ယာယီအပစ်ရပ်ရေး သက်တမ်းကုန်သွားတဲ့ ဒီကနေ့မနက်ပိုင်းက စတင်ပြီး ဂါဇာမှာ အစ္စရေးက တိုက်ခိုက်သတ်ဖြတ်မှုတွေ ပြန်လုပ်လာပါတယ်။ 

ဂါဇာတောင်ပိုင်း ရာဖာနယ်ခြားအပါအ၀င် အနည်းဆုံး ပါလက်စတိုင်း ပြည်သူ ဒါဇင်နဲ့ချီ အသတ်ခံလိုက်ရတယ်လို့ ပါလက်စတိုင်း ကျန်းမာရေး တာ၀န်ရှိသူတွေက ပြောပါတယ်။ 

ဂါဇာမြောက်ပိုင်းမှာ ဟားမက်စ်ကို ချေမှုန်းမှာ ဖြစ်တဲ့အတွက် တောင်ပိုင်းကိုရွှေ့ဖို့ အစ္စရေးက ထုတ်ပြန်ထား တာကြောင့် ပါလက်စတိုင်းပြည်သူတွေအားလုံး တောင်ပိုင်းကို ထွက်ပြေး ခိုလှုံနေရတာပါ။ 

ဒါပေမယ့် အစ္စရေးက ဂါဇာတောင်ပိုင်းမှာလည်း တိုက်ခိုက်သတ်ဖြတ်မှုတွေ လုပ်ဆောင်နေတာဖြစ်ပါတယ်။ 

ဟားမက်စ်ကို လက်တုန့်ပြန်တယ်ဆိုတဲ့ ခေါင်းစဥ်နဲ့ အောက်တိုဘာ ၇ ရက်နေ့နောက်ပိုင်း အစ္စရေးက ဂါဇာမှာ တိုက်ခိုက်သတ်ဖြတ်မှုတွေ လုပ်ဆောင်နေရာမှာ ပါလက်စတိုင်းပြည်သူတွေကို အဓိက ပစ်မှတ်ထားတာ ဖြစ်ပါတယ်။ 

နှစ်လနီးပါးအတွင်း ပါလက်စတိုင်းပြည်သူ ၁၅၀၀၀ ကျော် အသတ်ခံခဲ့ရပြီး ဂါဇာက ဆေးရုံတွေ၊ ကျောင်းတွေ၊ လူနေအဆောက်အအုံ ၈၀ ရာခိုင်နှုန်းနီးပါး ဖျက်ဆီးခံထားရပါတယ်။ 

ပြီးခဲ့တဲ့တစ်ပတ်က စတင်ကာ ဟားမက်စ်နဲ့ အစ္စရေးတို့ဟာ အပစ်ရပ်ရေးသဘောတူခဲ့ပြီး ဓားစားခံတွေ အပြန်အလှန်လွှတ်ပေးခဲ့ပါတယ်။ 

မနေ့က သက်တမ်းကုန်မယ့် အပစ်ရပ်ရေးကို ဆက်လက်သက်တမ်းတိုးဖို့အတွက် သူတို့ဖမ်းထားတဲ့ ဓားစားခံတွေကို ထပ်လွှတ်ပေးမယ်လို့ ကမ်းလှမ်းခဲ့ပေမယ့် အစ္စရေးက လက်မခံခဲ့ဘူးလို့ ဟားမက်စ်ဖက်က ထုတ်ပြန်ထားပါတယ်။ 

Ref: Aljazeera