အစ္စရေးစစ်တပ်မှာ ကျင့်၀တ်မဲ့ပြီး ရာဇ၀တ်မှုအကျူးလွန်ဆုံး စစ်တပ်ဟု ကုလအထူးကိုယ်စားလှယ် ပြော

ဇွန် ၂၂၊ ၂၀၂၄
M-Media 

-အစ္စရေးစစ်တပ်ဟာ ကျင့်၀တ်သိက္ခာမဲ့ပြီး၊ ကမ္ဘာပေါ်မှာ ရာဇ၀တ်မှုအကျူးလွန်ဆုံး စစ်တပ်တွေထဲက တစ်ခုဖြစ်တယ်လို့ ပါလက်စတိုင်း လူ့အခွင့်အရေးဆိုင်ရာ ကုလအထူးကိုယ်စားလှယ် ဖရန်ဆက်ကာ အလ်ဘန်နီးစ်က ပြောပါတယ်။ 

ကုလရဲ့ လွတ်လပ်တဲ့ နိုင်ငံတကာ စုံစမ်းစစ်ဆေးရေးကော်မရှင် အဖွဲ့၀င် ခရစ်ဆီဒိုတီကလည်း အစ္စရေးစစ်တပ်ဟာ ရာဇ၀တ်မှုအကျူူးလွန်ဆုံး စစ်တပ်တစ်ခုဖြစ်တယ်လို့ ပြီးခဲ့တဲ့ ရက်ပိုင်းမှာ ပြောကြားခဲ့ဖူးပါတယ်။ 

ဖမ်းဆီးထားတဲ့ ပါလက်စတိုင်းကလေးငယ်တစ်ဦးရဲ့ ကိုယ်ပေါ်ကို အစ္စရေးစစ်သားတွေက ကျင်ငယ်စွန့်ပြီး၊ ခွေးနဲ့ ရှုးတိုက်ကိုက်ခိုင်း၊ အောက်ပိုင်းသေပြီး မသေမရှင်ဖြစ်အောင်လုပ်တဲ့ သတင်းတစ်ခုကို ကုလအထူးကိုယ်စားလှယ် အလ်ဘန်နီးစ်က X (ယခင် Twitter) စာမျက်နှာမှာ ပြန်လည်မျှ၀ေရာမှာ အစ္စရေးစစ်တပ်ကို ပြင်းပြင်း ထန်ထန် ၀ေဖန်ရှုတ်ချခဲ့ပါတယ်။ 

“ကမ္ဘာပေါ်မှာ စစ်ရာဇ၀တ်မှုအကျူးလွန်ဆုံး စစ်တပ်ဖြစ်ပြီး၊ ကျင့်၀တ်သိက္ခာလည်း အမဲ့ဆုံးပါ။ ဒီလို ကောက်ချက်ချ ပြောဆိုဖို့အတွက် အကြားအမြင်ရနေစရာ မလိုပါဘူး”

အသတ်ခံရမှု မြင့်တက်

ပြီးခဲ့တဲ့နှစ် အောက်တိုဘာလက စတင်တဲ့ ဂါဇာက အစ္စရေးရဲ့ တစ်ကျော့ပြန်လူသတ်ပွဲမှာ အသတ်ခံရသူ အရေအတွက်ဟာ ၃၇၅၅၁ ဦး ရှိလာပြီ ဖြစ်ပါတယ်။

အဲဒီအထဲက ၁၅၀၀၀ လောက်ဟာ ကလေးငယ်တွေ ဖြစ်ပါတယ်။ အပျက်အဆီးတွေကြားမှာ ပိတ်မိပျောက်ဆုံးနေသူ အရေအတွက်ဟာ ၁၀၀၀၀ ကျော်ရှိနေပြီး ဒဏ်ရာရသူက ၈၅၉၁၁ ဦးရှိနေပါတယ်။ 

အစ္စရေးဟာ ဂါဇာမှာ လူနေအိမ်ယာ၊ စာသင်ကျောင်း၊ ဆေးရုံ၊ ဘာသာရေးအဆောက်အဦး စတာတွေကို အဓိက ပစ်မှတ်ထား တိုက်ခိုက်တာဖြစ်ပြီး ကုလအဖွဲ့၀င်တွေ၊ လခြမ်းနီအဖွဲ့၀င်နဲ့ နိုင်ငံတကာ အကူအညီပေးရေးအဖွဲ့၀င် အမြောက်အများကိုလည်း ပစ်မှတ်ထား အကြမ်းဖက် သတ်ဖြတ်ခဲ့ပါတယ်။ 

Ref: Aljazeera