Little India ဆူပူမှုနှင့် ပတ်သက်ပြီး အိန္ဒိယ နိုင်ငံသား၂၄ ဦးအား စင်ကာပူ တရားစွဲ

ဒီဇင်ဘာ- ၁၀ ၂၀၁၃
M-Media

– တနင်္ဂနွေနေ့ညက စင်ကာပူနိုင်ငံ Little India တစ်ဝိုက်တွင် ဖြစ်ပွားခဲ့သော ဆူပူအကြမ်းဖက်မှုနှင့်ပက်သက်၍ အိန္ဒိယနိုင်ငံသား ၂၄ ဦးအား ပဋိပက္ခ ဖန်တီးပြုလုပ်မှုဖြင့် တရားစွဲဆိုထားသည်ဟု သိရသည်။ ထို၂၄ ဦးစလုံးမှာ ယနေ့ နေ့လည်တွင် တရားရုံးတွင် တရားရင်ဆိုင်ခဲ့ရသည်။ ပြစ်မှုထင်ရှားပါက ကြိမ်ဒဏ်နှင့် အမြင့်ဆုံးထောင်ဒဏ် ၇ နှစ်ကျခံရဖွယ်ရှိနေသည်။

အိန္ဒိယအမျိုးသား အလုပ်သမားဖြစ်သူ Sakthivel Kumaravelu အား ကားတစ်စီးက တိုက်မိခဲ့ရာမှ အစပြုခဲ့သည့် အဆိုပါဆူပူအကြမ်းဖက်မှုတွင် လူပေါင်း ၄၀၀ ခန့်ပါဝင်ခဲ့ကြပြီး၊ ရဲတပ်ဖွဲ့ဝင်အများအပြား ဒဏ်ရာရခဲ့ကာ နှစ်ပေါင်း ၄၀ အတွင်း ပထမဆုံးအကြိမ် ဖြစ်ပွားခဲ့ခြင်းလည်းဖြစ်သည်။

အခင်းဖြစ်ပွားပြီးနောက် စင်ကာပူရဲများက လူ ၂၈ ဦးအား ဖမ်းဆီးထိန်းသိမ်းခဲ့ပြီး၊ PR ရရှိထားသည့် ဘင်္ဂလာဒေ့ရ်ှနိုင်ငံသား ၂ ဦးနှင့် အိန္ဒိယနိုင်ငံသား ၁ ဦးတို့အား အဆိုပါဖြစ်စဉ်တွင် ပါဝင် ပတ်သက်ခြင်းမရှိကြောင်း တွေ့ရှိခဲ့ရ၍ ပြန်လည် လွှတ်ပေးခဲ့သည်။

စင်ကာပူနိုင်ငံတွင် ဖြစ်ပွားခဲ့သည့် အဆိုပါ အဓိကရုဏ်းတွင် ဘင်္ဂလားဒေ့ရ်ှနိုင်ငံသား ဘင်္ဂလီများ ပါဝင်သည့်ဟု အစောပိုင်း ထွက်ပေါ်လာသည့် သတင်းများကို အခြေပြုပြီး ဆိုရှယ်မီဒီယာ အသုံးပြုသည့် အချို့သော မြန်မာလူမျိုးများကြားတွင် အစ္စလာမ်သာသနာနှင့် မြန်မာနိုင်ငံသား အစ္စလာမ်ဘာသာဝင်များကို  စော်ကားတိုက်ခိုက်သည့် ပိုစ်များ ပျံနှံ့ထွက်ပေါ်ခဲ့ကြောင်း တွေ့ရှိခဲ့ရပါသည်။