ဒီမာရီယာမှာ ကမ္ဘာ့အကောင်းဆုံး ၅ ဦးထဲမှ တစ်ဦးဟု အာဂျင်တီးနားနည်းပြ မာတီနိုပြောကြား

စက်တင်ဘာ ၄ ၊ ၂၀၁၄
M-Media

– ဂျာမနီအသင်းအား အနိုင်ရရှိခဲ့သော ခြေစမ်းပွဲတွင် ခြေစွမ်းပြနိုင်ခဲ့သည့် ဒီမာရီယာမှာ ကမ္ဘာ့အကောင်းဆုံး ကစားသမား ၅ ဦးထဲမှ တစ်ဦးဖြစ်သည်ဟု အာဂျင်တီးနား နည်းပြ မာတီနိုက ပြောကြားလိုက်သည်။

ယမန်နေ့က ကစားခဲ့သော အဆိုပါပွဲတွင် အာဂျင်တီးနားမှာ ဂျာမနီအား ၄ ဂိုး ၂ ဂိုးဖြင့် အနိုင်ရခဲ့ပြီး ဒီမာရီယာကိုယ်တိုင် ၁ ဂိုးသွင်းကာ၊ ကျန် ၃ ဂိုးကိုလည်း ဖန်တီးပေးနိုင်ခဲ့သည်။

အဓိကတိုက်စစ်မှူးများဖြစ်သည့် ဟီဂူအင်၊ မက်ဆီတို့ မပါသော်လည်း ဒီမာရီယာ၏ ခြေစွမ်းပြမှုကြောင့် အာဂျင်တီးနားမှာ ဒုတိယပိုင်း မိနစ် ၅၀ မှာပင် ၄ ဂိုးပြတ်ခဲ့သည်။ မာတီနိုကမူ ဒီမာရီယာမှာ ချီးကျူးခံထိုက်သည်ဟု ပြောကြားခဲ့သည်။

“ဘာ့ကြောင့် ကမ္ဘာ့အကောင်းဆုံး ကစားသမား ၅ ဦးထဲက တစ်ဦးဖြစ်တယ်ဆိုတာ ဒီမာရီယာက ပြသခဲ့ပါတယ်။ အသင်းနဲ့ပတ်သက်ပြီး အရမ်းကျေနပ်ပါတယ်။ ဘာ့ကြောင့်လည်းဆိုတော့ အတွေ့အကြုံအများကြီးမရှိတဲ့ ကစားသမားအနည်းငယ် ပါဝင်တာကြောင့်ပါ” ဟု မာတီနိုက ပွဲအပြီးတွင် သတင်းထောက်များအား ပြောကြားခဲ့သည်။

ယခုပွဲမှာ အာဂျင်တီးနားအသင်းနည်းပြအဖြစ် တာဝန်ယူခဲ့ပြီးနောက် မာတီနို၏ ပထမဆုံးပွဲဖြစ်ပြီး ကမ္ဘာ့ဖလားဗိုလ်လုပွဲ ရှုံးကြွေးကို ပြန်ဆပ်နိုင်ခဲ့ခြင်းလည်းဖြစ်သည်။