အီရတ်ရှိ ပထမဆုံး ခရစ်ယာန်တပ်မဟာသစ် သင်တန်းဆင်း

မတ် ၁၃၊ ၂၀၁၅
M-Media

– IS အား တော်လှန်ရန်နှင့် ၎င်းတို့သိမ်းပိုက်ထားသော နယ်မြေများကို ပြန်လည်သိမ်းယူရန်အတွက် ရည်ရွယ်ဖွဲ့စည်းထားသော ပထမဆုံး အီရတ်ခရစ်ယာန်တပ်မဟာသစ် တစ်ခုမှာ ယမန်နေ့က သင်တန်းဆင်းခဲ့သည်ဟု သိရသည်။

အဆိုပါ တပ်မဟာသစ်မှာ IS များကို ဦးဆောင်တိုက်ခိုက်နေသော ကာ့ဒ်တပ်ဖွဲ့ Peshmerga တည်ရှိရာ ကာ့ဒ်ဒေသတွင် တာဝန်ထမ်းဆောင်သွားမည်ဖြစ်သည်။ ဆီးရီးယား၊ တူရကီနိုင်ငံတို့နှင့် နီးသည့် အီရတ်နိုင်ငံမြောက်ပိုင်း ဖစ်ရ်ှခါဘောရ်မြို့တွင် ယမန်နေ့က ပြုလုပ်ခဲ့သော သင်တန်းဆင်းပွဲတွင် အဆိုပါ ခရစ်ယာန် တပ်မဟာမှာ ချီတက်လမ်းလျှောက်ခြင်း၊ စစ်ရေးပြခြင်းတို့ကို ပြုလုပ်ခဲ့ကြပြီး ကာဒ့်နှင့် အက်ဆီရီယန် တာဝန်ရှိသူများက ကြည့်ရှုစစ်ဆေးခဲ့ကြသည်။

အီရတ်ခရစ်ယာန်အများစုမှာ လွန်ခဲ့သည့် ၇ လ IS အဖွဲ့က တိုက်မှုများ မပြုလုပ်ခင် မူဆိုးလ်မြို့နှင့် ကာဒ့်မြို့တော် အာရ်ဘီလ်တို့ကြားရှိ နိုင်ဗာဟ်မြေပြန့်လွင်ပြင်တွင် နေထိုင်ကြသူများ ဖြစ်သည်။

“နိုင်ဗဟ်ဒေသက ကျွန်တော်တို့ရဲ့ ခရစ်ယာန်ညီနောင် ၆၀၀ လောက်ဟာ ရုပ်ပိုင်းဆိုင်ရာလေ့ကျင့်ခန်း၊ စစ်ဘက်ဆိုင်ရာ သင်ကြားမှုနဲ့ သေနတ်ပစ်လေ့ကျင့်ခန်းတွေကို သင်ကြားပေးတဲ့ ဒီသင်တန်းကို တက်ရောက်ခဲ့ကြပါတယ်။ ဒီတပ်ဖွဲ့ဝင်တွေအားလုံးဟာ ကိုယ့်သဘောနဲ့ကိုယ် ၀င်ရောက်လာကြတာပါ။ သူတို့ရဲ့ မြေကို IS ရဲ့လက်ထဲက လွတ်မြောက်ချင်ပြီး ထိန်းသိမ်းထားချင်ပါတယ်” ဟု လေ့ကျင့်ရေးအကယ်ဒီမှ တပ်မှူး အဘူ ဘာကာရ် အစ္စမာအီလ်က သင်တန်းဆင်း အခမ်းအနားတွင် ပြောကြားခဲ့သည်။

အဆိုပါ တပ်မဟာသစ်ကို “Tiger Guards” ဟု အမည်ပေးထားပြီး ဒေသအတွင်းရှိ ဘုရားကျောင်းများကို ကာကွယ်ရန် ၂၀၀၄ ခုနှစ်က ဖွဲ့စည်းထားသော အက်ဆီရီယန်တပ်ဖွဲ့မှ အကြွင်းအကျန်များကို စုပေါင်းဖွဲ့စည်းထားခြင်းဖြစ်သည်။

ကာ့ဒ်တပ်ဖွဲ့များ ထိန်းချုပ်ထားရာ ဒေသသို့ IS များ ၀င်ရောက်တိုက်ခိုက်ခဲ့သည့် ၂၀၁၄ ခုနှစ် သြဂုတ်လ အစောပိုင်းတွင် ခရစ်ယာန်ဦးရေ ၁၀၀၀၀၀ ခန့်မှာ ၎င်းတို့၏ နေရပ်ကို စွန့်ခွာ ထွက်ပြေးခဲ့ရသည်။

Ref: Alarabiya