ဘိုကိုဟာရမ်လက်မှ လွတ်မြောက်လာသည့် မိန်းကလေးငယ်ကို နိုက်ဂျီးရီးယားအစိုးရ ထောက်ပံ့မည်

မေ ၂၂၊ ၂၀၁၆
M-Media

– လွန်ခဲ့တဲ့ ၂ နှစ်က ဘိုကိုဟာရမ်ရဲ့ ပြန်ပေးဆွဲခြင်းခံခဲ့ရပြီးတဲ့နောက်မှာ ပြန်လည်လွတ်မြောက်လာခဲ့တဲ့ မိန်းကလေးငယ်တစ်ဦးရဲ့ ပညာရေးကို မိမိတို့အစိုးရက ထောက်ပံ့ပေးသွားမယ်လို့ နိုက်ဂျီးရီးယားသမ္မတ မဟာမာဒူ ဘူဟာရီက ကတိပြု ပြောကြားလိုက်ပါတယ်။

အဲဒီကျောင်းသူလေးဟာ အေမီနာ အလီ ဒါရှာ အန်ကေကီ ဆိုသူဖြစ်ပြီး နိုင်ငံအရှေ့မြောက်ပိုင်း ချီဘွက်မြို့က အလယ်တန်းကျောင်းတစ်ခုမှာ ၂၀၁၄ ခုနှစ်အတွင်း ဘိုကိုဟရမ်ရဲ့ ပြန်ပေးဆွဲခံခဲ့ရတဲ့ ကျောင်းသူ ၂၇၆ ဦးထဲက တစ်ဦးလည်းဖြစ်ပါတယ်။ သူမကို ဘိုဟိုဟရမ်ရဲ့ ခြေကုပ်စခန်း နယ်စပ်နားမှာ အင်္ဂါနေ့က တွေ့ရှိခဲ့တာဖြစ်ပြီး အစိုးရတပ်တွေက ဘိုကိုဟရမ်စခန်းကို နှိမ်နှင်းမှုအတွင်း လွတ်မြောက်လာတာလို့ ဆိုပါတယ်။

ကြာသာပတေးနေ့မှာတော့ အန်ကေကီကို သမ္မတ ဘူဟာရီက အဘူဂျာမှာရှိတဲ့ သမ္မတအိမ်တော်မှာ လက်ခံတွေ့ဆုံပြီး အားပေး နှစ်သိမ့်ခဲ့ပါတယ်။ ပြီးတဲ့နောက်မှာ သတင်းစာရှင်းလင်းပွဲတစ်ခုလည်း ပြုလုပ်ခဲ့ပြီး သမ္မတက ဘိုကိုဟရမ်လက်ထဲမှာရှိနေတဲ့ မိန်းကလေးတွေကို ဆက်လက်ရှာဖွေသွားမှာဖြစ်ကာ၊ အန်ကေကီရဲ့ ပညာရေးအတွက် ထောက်ပံ့ပေးသွားမယ်လို့ ကတိပြုပြောကြားခဲ့ပါတယ်။

“အေမီနာကို ကျောင်းပြန်တက်နိုင်အောင် ကူညီပေးရပါမယ်၊ နိုင်ဂျီရီးယားက ဘယ်မိန်းကလေးကိုမှ အတင်းအဓမ္မထိမ်းမြားလက်ထပ်တဲ့ ကြမ်းကြုတ်မှုမျိုး ခံစားစေလို့ မဖြစ်ပါဘူး။ မိန်းကလေးတိုင်းမှာ ပညာသင်ယူနိုင်ခွင့်၊ ဘ၀နဲ့ပက်သက်ပြီး ရွေးချယ်ခွင့်တွေ ရှိရပါမယ်” လို့ သမ္မတက ဆိုပါတယ်။

နိုင်ငံမြောက်ပိုင်းမှာ အခြေစိုက်ပြီး အကြမ်းဖက်လုပ်ရပ်တွေကို လုပ်ဆောင်နေတဲ့ ဘိုကိုဟရမ်အကြမ်းဖက်အဖွဲ့ကို အမြစ်ဖြတ်သုတ်သင်ဖို့ နိုက်ဂျီးရီးယားစစ်တပ်က ထိုးစစ်ဆင်မှုတွေ ပြုလုပ်နေပါတယ်။

Ref: IINA