ဘင်္ဂလားဒေ့ရှ်၏ တိုးတက်အောင်မြင်မှုကို တောင်အာရှနိုင်ငံများ အသိအမှတ်ပြုရတော့မည်

ဇွန် ၅၊ ၂၀၂၁
M-Media

-နယ်ပယ်စုံမှာ ဖွံဖြိုးတိုးတက်လာတဲ့ ဘင်္ဂလားဒေ့ရှ်ရဲ့ အောင်မြင်မှုကို အိန္ဒိယ၊ ပါကစ္စတန်တို့အပါအဝင် တောင်အာရှနိုင်ငံတွေက အသိအမှတ်ပြု လက်ခံရလိမ့်မယ်လို့ Bloomberg က ဆောင်းပါးတစ်ပုဒ်မှာ တိုက်တွန်းထားပါတယ်။

၁၉၇၁ ပါကစ္စတန်ကနေခွဲထွက်ပြီး လွတ်လပ်ရေးယူစဉ်တုန်းက ပါကစ္စတန်ဟာ ဘင်္ဂလာဒေ့ရှ်ထက် ၇၀ ရာခိုင်နှုန်းလောက် ချမ်းသာကြွယ်၀ပြီး၊ အင်အားတောင့်တင်းခဲ့တာပါ။ ဘင်္ဂလားဒေ့ရှ်ကတော့ စစ်ဒဏ်၊ ငတ်မွတ်ခေါင်းပါးမှုဒဏ်ကို ခါးစည်းခံခဲ့ရပါတယ်။

ပြီးခဲ့တဲ့နှစ် ဘင်္ဂလားဒေ့ရှ်ရဲ့ တစ်ဦးချင်း ဂျီဒီပီ (GDP per capita) ဟာ ၉ ရာခိုင်နှုန်းတိုးတက်ခဲ့ပြီးတဲ့ ဒေါ်လာ ၂၂၂၇ ရှိလာပါတယ်။ ဒါဟာ ​ပါကစ္စတန်နိုင်ငံထက် ၄၅ ရာခိုင်နှုန်း ပိုသာနေတာဖြစ်ပါတယ်။ ပါကစ္စတန်ရဲ့စီးပွားရေးဟာ လက်ရှိအနေအထားတိုင်းသွားမယ်ဆိုရင် ၂၀၃၀ ခုနှစ်အရောက်မှာ ဘင်္ဂလားဒေ့ရှ်ထံကနေ အကူအညီယူရတဲ့အထိ ဖြစ်လာနိုင်တယ်လို့ ပညာရှင်တွေက သုံးသပ်ပါတယ်။

အိန္ဒိယရဲ့ ၂၀၂၀-၂၁ GDP per capita က ဒေါ်လာ ၁၉၄၇ သာ ရှိပြီး ဒါဟာ ဘင်္ဂလားဒေ့ရှ်ထက် နည်းနေတာလည်း ဖြစ်ပါတယ်။

အာဏာရ ဟိန္ဒူအမျိုးသားရေးပါတီ BJP က လက်ယာစွန်းရောက်တွေက ဘင်္ဂလားဒေ့ရှ်ပြည်သူတွေဟာ စားရမဲ့သောက်ရမဲ့ ခိုကိုးရာမဲ့ဖြစ်နေပြီး အိန္ဒိယဖက်ကို ခိုးဝင်လာနေတယ်လို့ ပုံဖော်နေပေမယ့် တကယ်တမ်းမှာတော့ ဟိန္ဒူအမျိုးသားရေးအစွန်းရောက်တွေက ဘင်္ဂါလီ ‘ခြ’ တွေလို့ အမုန်းဝါဒဖြန့်နေတဲ့ ပြည်နယ်တွေထက် ဘင်္ဂလားဒေ့ရှ်ဟာ ပိုချမ်းသာတယ်လို့ Bloomberg က ဆောင်းပါးမှာ ရေးသားထားပါတယ်။

ဘင်္ဂလားဒေ့ရှ်ဟာ ပြည်ပတင်ပို့မှု၊ လူမှုစီးပွားနဲ့ ဘဏ္ဍာရေး ထိန်းချုပ်စီမံမှုတွေမှာ သိသိသာသာ တိုးတက်လာနေတာ ဖြစ်ပါတယ်။ ကမ္ဘာတစ်ဝှမ်း ပြည်ပပို့ကုန် ပျမ်းမျှတိုးတက်မှုက ၀.၄ ရာခိုင်နှုန်းရှိနေတဲ့အချိန် ၂၀၁၁ ခုနှစ်ကနေ ၂၀၁၉ ခုနှစ်အတွင်း ဘင်္ဂလားဒေ့ရှ်ရဲ့ ပြည်ပပို့ကုန်ဟာ နှစ်စဉ် ၈.၆ ရာခိုင်နှုန်း မြင့်တက်ခဲ့ပါတယ်။

တိုင်းပြည်ရဲ့ ထုတ်ကုန် အထူးသဖြင့် အထည်ချုပ်လုပ်ငန်းကို အဓိကထား အကောင်အထည်ဖော်မှုကြောင့် ဒီလို တိုးတက်လာတာ ဖြစ်ပါတယ်။ ဘင်္ဂလားဒေ့ရှ်မှာ အမျိုးသမီးတွေ အလုပ်လုပ်ကိုင်မှု အရေအတွက်ဟာလည်း အိန္ဒိယ၊ ပါကစ္စတန်တို့ထက် သိသိသာသာကို မြင့်မားပါတယ်။

ဖွံ့ဖြိုးမှုနိမ့်ကျတဲ့နိုင်ငံ စာရင်းထဲမှာ ပါဝင်နေတဲ့အတွက် အခွန်ကင်းလွတ်ခွင့်လို ကမ္ဘာ့စီးပွားရေးယန္တရားမှာ အခွင့်ထူးခံ ရနေတာကလည်း ဘင်္ဂလားဒေ့ရှ်ကို တစ်ပန်းသာစေခဲ့တာပါ။ စီးပွားရေး တိုးတက်လာတာကြောင့် အဲဒီအခွင့်ထူးတွေကို ဘင်္ဂလားဒေ့ရှ်က ၂၀၂၆ ခုနှစ်မှာ စွန့်လွှတ်ရဖို့ ရှိပါတယ်။

စီးပွားရေး တည်ငြိမ်ဖွံ့ဖြိုးလာတာနဲ့အမျှ အထည်ချုပ်လုပ်ငန်းကနေ တစ်ခြား တန်ဖိုးမြင့်တဲ့ပို့ကုန်တွေ တင်ပို့နိုင်ဖို့ ဘင်္ဂလားဒေ့ရှ်က ခြေလှမ်းလာဖွယ် ရှိနေပါတယ်။

လာမယ့် ၁၀ စုနှစ်တွေအတွင်း စီးပွားရေး အခုထက် ပိုမိုဖွံ့ဖြိုးတိုးတက်လာဖို့ ရင်ဆိုင်ရမယ့် စိန်ခေါ်မှုတွေ ဘင်္ဂလားဒေ့ရှ်မှာ အများကြီး ရှိနေပါတယ်။

ဘင်္ဂလားဒေ့ရှ်ကို အထင်အမြင်သေးတာဟာ အသိဉာဏ်နည်းရာကျကြောင်း လွန်ခဲ့တဲ့ နှစ် ၅၀ က သက်သေပြနေပါတယ်။ ၁၉၇၁ ခုနှစ်က အောင်မြင်မှုဆိုတာကို မမျှော်မှန်းနိုင်ခဲ့ဘဲ လူ သန်း ၁၆၀ နဲ့ ကြပ်ညပ်နေတဲ့ နိုင်ငံတစ်တစ်ခုဟာ အခုအချိန်မှာတော့ တောင်အာရှက နမူနာယူစရာ အောင်မြင်မှုပြယုဂ်ဖြစ်နေပြီလို့ Bloomberg က ဆောင်းပါးမှာ နိဂုံးချုပ် သုံးသပ်ထားပါတယ်။

Ref: Bloomberg