အရှေ့အလယ်ပိုင်း၏ ပထမဆုံး ကျည်ဆံရထားပိုက်လော့အဖြစ် ဆော်ဒီအမျိုးသမီးများ မှတ်တမ်း၀င်မည်

ဇန်န၀ါရီ ၃၊ ၂၀၂၂

M-Media 

– ဆော်ဒီအာရေဗျရဲ့ ပထမဆုံး အမျိုးသမီး ကျည်ဆံရထားစက်ခေါင်းမှူး ၃၂ ဦး သင်တန်ပြီးဆုံးပြီး တာ၀န်ထမ်းဆောင်တော့မှာဖြစ်ကြောင်း ဆော်ဒီ မီးရထား၀န်ကြီးဌာန SAR က ဇန်န၀ါရီ ၁ ရက်နေ့မှာ ထုတ်ပြန်ပါတယ်။ 

အမျိုးသမီးစက်ခေါင်းမှုတွေဟာ ကျည်ဆံရထားလိုင်းတွေ အပါအ၀င် နိုင်ငံရဲ့ ရထားလိုင်းအားလုံးမှာ တာ၀န်ထမ်းဆောင်ရမှာ ဖြစ်ပါတယ်။ 

ပထမအသုတ်အဖြစ် အမျိုးသမီး ၃၂ ဦးကို တစ်နှစ်ကြာ သင်တန်းပေးခဲ့ပြီး ဟာရာမိန်း ကျည်ဆံရထားလိုင်းမှာ စတင် တာ၀န်ထမ်းဆောင်ရမှာပါ။  

အစ္စလာမ်သာသနာရဲ့ မြင့်မြတ်ရာဒေသတွေဖြစ်တဲ့ မက္ကာ-မဒီနာ ကျည်ဆံရထားလိုင်းမှာ ရထားမောင်းရမယ့် ဆာရာ အလ် ရှဟ်ရီက ဂုဏ်ယူတယ်လို့ ပြောပါတယ်။ 

“အရှေ့အလယ်ပိုင်းမှာ အမြန်ရထားကို ပထမဆုံး မောင်းရမယ့် အမျိုးသမီးအဖြစ် မှတ်တမ်း၀င်တဲ့အတွက် ကျွန်မနဲ့ လုပ်ဖော်ကိုင်ဖက်တွေအားလုံး ဂုဏ်ယူနေကြပါတယ်”

အခြား ကျည်ဆံရထား စက်ခေါင်းမှူး နိုရာ ဟီရှမ်ကလည်း မက္ကာ-မဒီနာ လိုင်းမှာ တာ၀န်ထမ်းဆောင်ရတာဟာ ဟဂျ်နဲ့ အွမ္မရာ ဘုရားဖူးတွေရဲ့ ဘေးအန္တရာယ်ကင်းရှင်းရေးကို တာ၀န်ခံရတဲ့အတွက် တာ၀န်ကြီးတယ်လို့ ပြောပါတယ်။ 

ဆော်ဒီအာရေဗျမှာ ရှေးရိုးစွဲရိုးရာအရ အရင်က အမျိုးသမီးတွေကို ကားမောင်းခွင့်မပေးခဲ့ဘဲ ၂၀၁၈ ခုနှစ်မှာမှ ဒီကန့်သတ်ချက်ကို အစိုးရက ရုပ်သိမ်းခဲ့တာ ဖြစ်ပါတယ်။ 

ပထမဆုံး ကျည်ဆံရထား ပိုက်လော့သင်တန်းအတွက် ဆော်ဒီအမျိုးသမီး ၂၈၀၀၀ လောက် ၀င်ခွင့်လျှောက်ထားခဲ့ကြပါတယ်။ 

Ref: Arab News