တရုတ်ကိုဗစ်လှိုင်းသစ်ကို ကမ္ဘာ့က ဘာ့ကြောင့် ကြောက်နေတာလဲ

ဇန်န၀ါရီ ၃၊ ၂၀၂၂

M-Media 

-တရုတ်နိုင်ငံမှာ နို၀င်ဘာလကတည်းက ကိုဗစ်လှိုင်းသစ် ပြန်လည် ဖြစ်ပွားလာခဲ့ပြီး နိုင်ငံတကာကလည်း သတိထား စောင့်ကြည့်လာပါတယ်။ 

ဒီဇင်ဘာနှောင်းပိုင်းမှာတော့ ကမ္ဘာ့နိုင်ငံတစ်ချို့ဟာ ကိုဗစ်ကူးစက်မှုကို ကြိုတင်ကာကွယ်နိုင်ရေးအတွက် တရုတ်ခရီးသွားတွေကို ပြည်၀င်ခွင့် ပိတ်ပင်တာတွေ လုပ်ဆောင်လာပါတယ်။ 

ဘာ့ကြောင့် ကမ္ဘာကြီးက တရုတ်ကိုဗစ်လှိုင်းသစ်ကို ကြောက်နေတာလဲ?

အချက်အလက်များ လျှို့၀ှက်ထားခြင်း

တရုတ်အစိုးရဟာ ကိုဗစ်နဲ့ပတ်သက်တဲ့ အချက်အလက်တွေကို တိတိကျကျ ထုတ်ပြန်ခြင်း မရှိပါဘူး။ 

၂၀၁၉ ခုနှစ် နှောင်းပိုင်း ၀ူဟန်မြို့မှာ ကိုဗစ်စတင် ကူးစက်ခဲ့ပေမယ့် တရုတ်အစိုးရက ဒီသတင်းကို လျှို့၀ှက်ထားခဲ့ပြီး ၂၀၂၀ ခုနှစ် ဇန်န၀ါရီလလောက်မှ ထုတ်ပြန်ခဲ့ပါတယ်။ 

ဒီလို သတင်းတွေ ထိန်ချန်ထားတာကြောင့် ကမ္ဘာ့နိုင်ငံတွေဟာ ကိုဗစ် ကြိုတင်ကာကွယ်မှု အစီအစဥ်တွေ မြန်မြန်ဆန်ဆန် မလုပ်နိုင်ဘဲ အကြီးအကျယ် ပြန့်နှံ့သွားခဲ့ပါတယ်။  

အခု တစ်ကျော့ပြန် ကိုဗစ်လှိုင်းမှာလည်း အစပိုင်းမှာ တရုတ်အစိုးရက သတင်း တိတိကျကျ ထုတ်ပြန်ခဲ့ခြင်းမရှိဘဲ ဒီဇင်ဘာလရောက်မှ ကူးစက်မှုဟာ ခြေရာခံဖို့ ခက်ခဲတယ်လို့ ထုတ်ပြန်ပါတယ်။ 

တရုတ်အစိုးရက ထုတ်ပြန်တဲ့ ကူးစက်မှု၊ သေဆုံးမှု စာရင်းတွေကလည်း မြေပြင်အချက်အလက်တွေထက် အလွန်အမင်း နည်းနေတာလို့ ကျွမ်းကျင်သူတွေက သုံးသပ်ပါတယ်။ 

ကိုဗစ်ကူးစက်မှုကြောင့် ဆေးရုံတွေ၊ မီးသင်္ဂြိုဟ်စက်တွေ ပြည့်နေတယ်လို့ သတင်းထွက်လာတဲ့အချိန် ကူးစက်၊ သေဆုံးမှု အချက်အလက်တွေကို ဒီဇင်ဘာအလယ်ပိုင်းကစပြီး တရုတ်အစိုးရက မထုတ်ပြန်တော့ပါဘူး။ 

တရုတ်ခရီးသွားတွေကို ပြည်၀င်ခွင့်ကန့်သတ်တဲ့ နိုင်ငံတစ်၀ှမ်းက တရုတ်အစိုးရရဲ့ အချက်အလက်ထိန်ချန်မှုကြောင့် ဒီလို ကန့်သတ်တာတွေ လုပ်ဆောင်ရတာလို့ ထုတ်ပြန်ကြပါတယ်။ 

အာဏာပိုင်များ၏ စကားမညီခြင်း 

ကိုဗစ်လှိုင်းသစ်ဟာ ဘေးဂျင်းနဲ့ အခြားမြို့ကြီးတွေမှာ ဖြစ်ပွားနေတာဖြစ်ပြီး အဲဒီမြို့တွေက အာဏာပိုင်တွေရဲ့ ထုတ်ပြန်ချက်တွေမှာ ကွဲလွဲမှုတွေ ရှိနေပါတယ်။ 

ဒေသတွင်း အာဏာပိုင်တွေက ကူးစက်မှုအရေအတွက် အများအပြား ရှိတယ်လို့ ပြောပေမယ့် ဗဟိုအစိုးရ ကျန်းမာရေးဆိုင်ရာ တာ၀န်ရှိသူ ၀မ်ကျန်းယိုက မြို့ကြီးတွေမှာ အကြီးအကျယ် ကူးစက်မှုအခြေအနေကို ကျော်လွန်သွားပြီလို့ ပြီးခဲ့တဲ့ တစ်ပတ်မှာ ထုတ်ပြန်ခဲ့ပါတယ်။ 

ပေါက်ကြားလာတဲ့ တရုတ်အစိုးရရဲ့ လျှို့၀ှက် အချက်အလက်တွေအရ ဒီဇင်ဘာလ ပထမရက် ၂၀ အတွင်း နိုင်ငံတစ်၀ှမ်း ကူးစက်သူအရေအတွက်ဟာ သန်း ၂၅၀ လောက်ရှိတာကို တွေ့ရပါတယ်။

နိုင်ငံတကာ ဆေးဘက်ဆိုင်ရာ ကျွမ်းကျင်သူတွေက တရုတ်နိုင်ငံမှာ ဧပြီလနှောင်းပိုင်းလောက်အထိ ကိုဗစ်ကူးစက်မှု အကြီးအကျယ် ဆက်ဖြစ်ဖို့ရှိနေပြီး အနည်းဆုံး လူ ၁.၇ သန်းလောက် သေဆုံးမယ်လို့ ခန့်မှန်းထားပါတယ်။  

ပုံပြောင်းပိုးအသစ်များ 

ကူးစက်မှု အကြီးအကျယ် ဖြစ်လာတာနဲ့အတူ ပုံပြောင်းပိုးအသစ်တွေ ထွက်လာမယ့်အရေးကိုလည်း ကမ္ဘာကြီးက စိုးရိမ်နေပါတယ်။ 

လက်ရှိ တရုတ်နိုင်ငံမှာ ကူးစက်နေတဲ့ ပုံပြောင်းပိုးတွေဟာ အိုမီခရွန် BA.5.2၊ BF.7 တွေဖြစ်ပါတယ်။ နိုင်ငံတကာမှာတော့ ဒီပိုးတွေ ကူးစက်ပြီးထားပြီး XBB နဲ့ BQ ပုံပြောင်းပိုးတွေအထိ ရောက်ရှိနေပြီဖြစ်ပါတယ်။ 

တရုတ်နိုင်ငံမှာ XBB နဲ့ BQ မျိုးကွဲတွေ မဖြစ်သေးပါဘူး။ ဒီပိုးတွေ ကူးစက်လာရင် ကိုဗစ်လှိုင်း ပိုမိုဆိုးရွားသွားဖို့ ရှိနေပြီး နောက်ထပ် ပုံပြောင်းပိုးအသစ်တွေ ပေါ်လာမယ့် အန္တရာယ်လည်း ရှိနေပါတယ်။ 

Ref: NDTV