ညီမကိုဖယ်ထုတ်ပြီး သမီးကို ကင်ဂျုံအွန်က အာဏာအမွေ ပေးတော့မှာလား

ဖေဖော်၀ါရီ ၁၀၊ ၂၀၂၃

M-Media 

-ပြီးခဲ့တဲ့ ဗုဒ္ဓဟူးနေ့ မြို့တော်ပြုံယမ်းမှာ ပြုလုပ်တဲ့ ဒုံးကျည်သစ် ပြပွဲအခမ်းအနားမှာ မြောက်ကိုရီးယား ခေါင်းဆောင် ကင်ဂျုံအွန်ဟာ သမီးဖြစ်သူ ထပ်မံ ပွဲထုတ်လာခဲ့ပါတယ်။ 

အသက် ၁၀ နှစ်အရွယ် ကင်ဂျူအယ်ကို လူမြင်ကွင်းမှာ ပွဲထုတ်လာတာဟာ ၃ လအတွင်း ၅ ကြိမ်မြောက် ရှိလာပြီး ဓားထက်တယ်လို့ နာမည်ကြီးတဲ့ ညီမဖြစ်သူကို ဖယ်ထုတ်ကာ သမီးကို အာဏာအမွေပေးဖို့ ကင်ဂျုံအွန်က စီစဥ်နေတယ်ဆိုတဲ့ သုံးသပ်မှုတွေ ထွက်ပေါ်လာပါတယ်။ 

ကင်ဂျုံအွန်မှာ သားသမီး ၃ ယောက်ရှိပြီး အကြီးဆုံးက သားဖြစ်ကာ၊ ကင်ဂျူအယ်က ဒုတိယမြောက်သမီးဖြစ်ပါတယ်။ ဂျူအယ်အောက်မှာ နောက်ထပ် သမီးတစ်ယောက် ရှိပါတယ်။ 

ဂျူအယ်ကို ပြီးခဲ့တဲ့နှစ် နို၀င်ဘာ တိုက်ချင်းပစ်ဒုံးကျည်သစ် ပြပွဲအခမ်းအနားမှာ ပထမဆုံး ပွဲထုတ်လာတာပါ။ ဖခင်ကောင်းတစ်ယောက်ဖြစ်တယ်၊ မိသားစုဟာ ဒုံးကျည်တွေလိုပဲ အရေးပါတယ်လို ကင်ဂျုံအွန်က ကမ္ဘာကို ချပြလိုတဲ့ ရည်ရွယ်ချက် ရှိနိုင်ပါတယ်။  

အဲဒီနောက်ပိုင်း နိုင်ငံရဲ့ထိပ်တန်းအခမ်းအနားတွေမှာ ဂျူအယ်ကို ဆက်တိုက် မြင်လာရတဲ့နောက်ပိုင်း ကမ္ဘာ့အလျှို့၀ှက်ဆုံး တိုင်းပြည်ရဲ့ အနာဂတ်ခေါင်းဆောင်အဖြစ် ကင်ဂျုံအွန်က လျာထားနေပြီလားဆိုတဲ့ မေးခွန်းတွေလည်း ပေါ်ထွက်လာပါတယ်။ 

အခမ်းအနားတိုင်းမှာ ဂျူအယ်ဟာ ဖခင်ဖြစ်သူရဲ့ အနီးဆုံးမှာရှိနေပြီး၊ နိုင်ငံပိုင်မီဒီယာက ဂျူအယ်ကို ခေါ်၀ေါ်တဲ့ အသုံးအနှုန်းတွေကလည်း အနာဂတ်ခေါင်းဆောင်တစ်ဦးအဖြစ် ရည်ညွှန်းသလို ဖြစ်နေပါတယ်။ 

ပထမဆုံး လူမြင်ကွင်းကို ထွက်လာတဲ့အချိန် နိုင်ငံပိုင်မီဒီယာက ကင်ဂျုံအွန်ရဲ့ ‘ချစ်လှစွာသောသမီး’ လို့ သုံးနှုန်းခဲ့ပြီး၊ အင်္ဂါနေ့ကလုပ်တဲ့ စစ်တပ်ရဲ့ ညစာစားပွဲမှာ ‘လေးစားရသော သမီး’ လို့ သုံးနှုန်းလာပါတယ်။ မြောက်ကိုရီးယားလိုနိုင်ငံမျိုးမှာ ဒီအသုံးအနှုန်းဟာ ကြည်ညိုထိုက်သူလို့ ယူဆရသူတွေကိုသာ ခေါ်ဆိုတာတာပါ။ 

ကင်ဂျုံအွန်ကို အနာဂတ်ခေါင်းဆောင်အဖြစ် သတ်မှတ်ပြီးနောက်ပိုင်း နိုင်ငံပိုင်မီဒီယာတွေက ‘လေးစားရသော ရဲဘော်’ လို့ သုံးနှုန်းခဲ့ပြီး ဂျူအယ်ကို ဒီအသုံးအနှုန်းနဲ့ ခေါ်ဆိုရင်တော့ နောက်တက်မယ့် ခေါင်းဆောင်ဆိုတာ သေချာနေပြီ ဖြစ်ပါတယ်။

အာဏာရှင် ကင်မိသားစု

မြောက်ကိုရီးယားကို စတင်တည်ထောင်စဥ်ကစပြီး ကင်မိသားစုဟာ အာဏာဆုပ်ကိုင်အုပ်ချုပ်လာတာ မျိုးဆက် ၃ ဆက် ရှိနေပြီး လက်ရှိခေါင်းဆောင် ကင်ဂျုံအွန်က စတုတ္ထမြောက် အာဏာရှင်မျိုးဆက် ဆက်လက်ရှင်သန်စေဖို့ ဆန္ဒရှိနေပါတယ်။ 

ကင်ဂျုံအွန်တုန်းက အသက် ၈ နှစ်အရွယ်မှာ ဖခင် ကင်ဂျုံအီက သူ့ကိုဆက်ခံမယ့်သူအဖြစ် ကြေငြာခဲ့ပေမယ့် စစ်ခေါင်းဆောင်တွေရဲ့ လျို့၀ှက်အစည်းအ၀ေးမှာ ဖြစ်ပါတယ်။

ကင်ဂျုံအွန်ကတော့ သူ့သမီးကို စောစောစီးစီးပဲ လူထုရှေ့ထုတ်ပြလာပါတယ်။ သူ့အဖေ ကင်ဂျုံအီ ရုတ်တရက် ကွယ်လွန်သွားပြီး အာဏာရပ်၀န်းကို ခက်ခက်ခဲခဲ တည်ဆောက်ရတဲ့ အခြေအနေမျိုး သူ့သမီးမှာမဖြစ်ရအောင် အခုကတည်းက စတင်ပုံသွင်းပေးထားတာ ဖြစ်နိုင်တယ်လို့ ကျွမ်းကျင်သူတွေက သုံးပါတယ်။ 

မြောက်ကိုရီးယားမှာ ကင်မိသားစုကသာ အာဏာဆုပ်ကိုင်ပြီး အုပ်ချုပ်မင်းလုပ်ပိုင်ခွင့်ရှိတယ်လို့ ပြည်သူတွေကို ဦးနှောင်းကျင်းထားတာ ဖြစ်ပါတယ်။ 

ဖို၀ါဒကြီးစိုးတဲ့ မြောက်ကိုရီးယားမှာ အမျိုးသမီးတစ်ယောက် တိုင်းပြည်ဦးဆောင်သူ ဖြစ်လာဖို့ မလွယ်ကူဘူးလို့ ယူဆတဲ့အတွက် အခုကတည်းက ကြိုတင်ပြင်ဆင်ထားတာလို့ ယူဆမှုတွေလည်း ရှိပါတယ်။ 

NK News သတင်းဌာန မြောက်ကိုရီးယားအရေး လေ့လာဆန်းစစ်သူ ဂျိမ်းစ် ဖရတ်၀ဲလ်က အမျိုးသမီးတစ်ယောက်ကို ခေါင်းဆောင်အဖြစ်တင်ဖို့ မြောက်ကိုရီးယားလို အာဏာရှင်တိုင်းပြည်မှာ အခက်အခဲမရှိဘူးလို့ သုံးသပ်ပါတယ်။ 

“မြောက်ကိုရီးယားဟာ မဟာဖို၀ါဒကြီးစိုးတဲ့ လူ့အဖွဲ့အစည်းဖြစ်သလို၊ ကင်မိသားစုကလည်း လူ့အဖွဲ့အစည်းကို လွှမ်းမိုးမှု ရှိပါတယ်။ ဒီထက်ပိုအရေးပါတာက သွေးပါ။ ကင်ဂျုံအွန်ရဲ့သမီးဖြစ်တယ်ဆိုတာနဲ့ပဲ  ဂျူအယ်ဟာ အနာဂတ်ခေါင်းဆောင်တစ်ယောက် ဖြစ်လာနိုင်ပါပြီ။ ကင်မိသားစုထဲမဟုတ်တဲ့ အမျိုးသားဖြစ်ဖြစ်၊ အမျိုးသမီးဖြစ်ဖြစ် ခေါင်းဆောင်ဖြစ်လာမှသာ အံ့သြစရာ ဖြစ်မှာပါ”

ဒါပေမယ့် လူထု၊ စစ်တပ်နဲ့ အာဏာရှင်ထိပ်တန်းအသိုင်းအ၀ိုင်းက ဂျူအယ်ကို လက်ခံလာအောင် ကင်ဂျုံအွန်က ကြိုးစားရပါလိမ့်မယ်။ 

ဂျူအယ်တစ်ယောက် အနာဂတ် မြောက်ကိုရီးယားခေါင်းဆောင် ဖြစ်လာမလားဆိုတာ အခုအချိန်မှာ ကံသေကံမ မပြောနိုင်သေးပေမယ့်၊ ကင်ဂျုံအွန်သာ ဆန္ဒရှိရင် ဖြစ်လာနိုင်မယ့် အလားအလာ ရှိနေတာတော့ အသေအချာပဲ ဖြစ်ပါတယ်။ 

Ref: BBC