တစ်ချက် ၁၃ ဒေါ်လာသာ ကျမယ့် ယူကေရဲ့ စွမ်းအားမြင့် လေဆာလက်နက်

ဇွန် ၁၀၊ ၂၀၂၄

M-Media 

-DragonFire လို့ အမည်ပေးထားတဲ့ ယူကေရဲ့ ပထမဆုံး လေဆာလက်နက်နဲ့ ကောင်းကင်က ပစ်မှတ်တွေကို စမ်းသပ် ပစ်ခတ်ရာမှာ အောင်မြင်ခဲ့တယ်လို့ သိရပါတယ်။ 

စတာလင်ပေါင် သန်း ၁၀၀ တန်ဖိုးရှိတဲ့ DragonFire စီမံကိန်းကို ယူကေ ကာကွယ်ရေး၀န်ကြီးဌာနက ၂၀၁၇ ခုနှစ်မှာ စတင် အကောင်အထည်ဖော်ခဲ့တာပါ။ 

လက်ရှိ စမ်းသပ်ဆဲအဆင့်မှာ ကြည်း၊ ရေ၊ လေ ပစ်မှတ်တွေကို တိတိကျကျ ထိမှန်အောင် ပစ်ခတ်နိုင်တာကို တွေ့ရပါတယ်။ DragonFire က ၁၀ မိနစ်တာထွက်တဲ့ အပူချိန်ဟာ လေပူပေးစက်က တစ်နာရီထွက်တဲ့ အပူချိန်နဲ့ ညီမျှပါတယ်။

DragonFire နဲ့ တစ်ချက်ပစ်ခတ်မှုဟာ ကုန်ကျစားရိတ် ၁၀ ပေါင် (၁၃ ဒေါ်လာ) သာ ကျသင့်မှာဖြစ်ပြီး ဒါဟာ ဒုံးကျည်အခြေပြု လေကြောင်းရန် ကာကွယ်ရေးစနစ်တွေထက် ကုန်ကျစားရိတ် ပိုမို သက်သာစေပါတယ်။ 

“စျေးကြီးတဲ့ လက်နက်ခဲယမ်းတွေကို မှီခိုနေရမှု၊ ဘေးထွက်ပျက်ဆီးဆုံးရှုံးမှုတွေကို လျှော့ချနိုင်တာကြောင့် ဒီ နောက်ဆုံးပေါ်လက်နက်ဟာ စစ်ပွဲတွေကို ပြောင်းလဲပစ်နိုင်မှာပါ” လို့ ယူကေ ကာကွယ်ရေး၀န်ကြီး ဂရန့်ရှပ်က ပြောပါတယ်။ 

ယူကရဲ့ DragonFire လေဆာလက်နက်ဟာ လက်ရှိ သုသေသနအဆင့်မှာသာ ရှိနေသေးပြီး လက်တွေ့ ကျယ်ကျယ်ပြန့်ပြန့် အသုံးချနိုင်ဖို့အတွက် စတာလင်ပေါင်သန်းရာချီ ကုန်ကျမှာ ဖြစ်ပါတယ်။ 

static high-power လေဆာရောင်ခြည်ကို ပထမဆုံး အသုံးပြုနိုင်မှု၊ ကုန်းမြေနဲ့ ရေပြင်မှာ ရွေ့လျားပစ်မှတ်တွေကို တိတိကျကျနဲ့ ပစ်ခတ်နိုင်မှု စတဲ့ မှတ်တမ်းကောင်းတွေကို DragonFire က ပိုင်ဆိုင်ထားပါတယ်။ 

Ref: Interesting Engineering